ეროვნული საინვესტიციო სააგენტოს საქმიანობის მხარდაჭერის მიზნით მრჩეველთა საბჭო იქმნება.
აღნიშნული ინიციატივის მიზნად მთავრობაში სააგენტოს კონკრეტულ საინვესტიციო პროექტებთან დაკავშირებული საკითხებისა თუ პრობლემების უფრო სწრაფ გადაწყვეტას ასახელებენ.
მთავრობაში აცხადებენ, რომ საბჭოს საქმიანობა ხელს შეუწყობს სააგენტოს თავისი ამოცანების სრულყოფილად და დროულად განხორციელებაში, რითაც მთავრობას თავისუფალი ეკონომიკის კურსის შენარჩუნებაში დაეხმარება. ეს კი თავის მხრივ სწრაფ ეკონომიკურ ზრდას უზრუნველყოფს და მეწარმეებსა და ინვესტორებს შესაძლებლობას მისცემს, სრულად გამოავლინონ პოტენციალი და უზრუნველყონ მოსახლეობის დასაქმება.
წინასწარი ინფორმაციით, საბჭოს თავმჯდომარე პრემიერ-მინისტრი ნიკა გილაური იქნება, ხოლო თავმჯდომარის მოადგილის მოვალეობას ეკონომიკისა და მდგრადი განვითარების მინისტრი ვერა ქობალია შეასრულებს.
საბჭოს შემადგენლობაში შევლენ, ასევე, საგარეო საქმეთა მინისტრი გრიგოლ ვაშაძე, სოფლის მეურნეობის მინისტრი ბაკურ კვეზერელი, იუსტიციის მინისტრი ზურაბ ადეიშვილი, ენერგეტიკის მინისტრი ალექსანდრე ხეთაგური, ფინანსთა მინისტრი კახა ბაინდურაშვილი, სებ-ის პრეზიდენტი გიორგი ქადაგიძე, აჭარის ავტონომიური რესპუბლიკის მთავრობის თავმჯდომარე ლევან ვარშალომიძე,თბილისის მერი გიგი უგულავა.
საბჭოს შემადგენლობაში მოხვდებიან ბიზნესმენები _ მიხო სვიმონიშვილი, გია ჭირაქაძე, ჯემალ ინაიშვილი, გია ყარამანიშვილი.