მაღალმთიან რეგიონებში წყალმომარაგების საფასური სეზონების მიხედვით განისაზღვრება.
აღნიშნულთან დაკავშირებით ცვლილებები შედის ელექტროენერგეტიკისა და ბუნებრივი გაზის შესახებ საქართველოს კანონში.
კანონპროქტის მიხედვით, წყალმომარაგების განსხვავებული საფასურის დარიცხვის წესს სეზონების გათვალისწინებით საქართველოს ენერგეტიკისა და წყალმომარაგების მარეგულირებელი ეროვნული კომისია განსაზღვრავს.
კანონპროექტის მიღების მიზეზი გამომდინარეობს იქედან, რომ საქართველოს მაღალმთიან რეგიონებში არსებულ ურბანულ დასახლებებში (მესტია, ლენტეხი, სტეფანწმინდა, ახალქალაქი, ფასანაური, ნინოწმინდა და სხვა მაღალ ნიშნულზე მდებარე დასახლებები) წყალსადენის მომხმარებელ აბონენტთა გამრიცხველიანებისთვის არსებული რთული კლიმატური პირობებიდან გამომდინარე, შექმნილია ხელის შემშლელი პირობები.
კერძოდ კი ამ დასახლებებში არსებულ გამანაწილებელ ქსელებში წყლის აღრიცხვის კვანძების მოწყობის შემდეგ, აღიკვეთება წყლის უყაირათო მოხმარება, მაგრამ ზამთრის ყინვიანი კლიმატის ზემოქმედების პირობებში იქმნება ქსელში წყლის გაყინვის და შესაბამისად მილსადენებისა და წყლის აღრიცხვის მრიცხველების მწყობრიდან გამოსვლის საშიშროება.
სამუშაოები, მათი მოცულობიდან გამომდინარე, ეტაპობრივად შეთანხმებულ ვადებში უნდა შესრულდეს, თუმცა, სისტემის საბოლოო მოწესრიგებამდე ენერგეტიკისა და წყალმომარაგების მერეგულირებელ ეროვნულ კომისიას ენიჭება უფლებამოსილება, გამრიცხველიანებული საყოფაცხოვრებო ან არასაყოფაცხოვრებო მომხმარებლისთვის წყალმომარაგების საფასურის დარიცხვის წესი სეზონების გათვალისწინებით განსხვავებულად განსაზღვროს.
აღნიშნული კანონპროექტი დღეს დარგობრივი ეკონომიკისა და ეკონომიკური პოლიტიკის კომიტეტის სხომაზე განიხილეს და პლენარულ სხდომაზე სავარაუდოდ საგაზაფხულო სესიაზე 8-11 თებერვალს გავა.
კანონპროექტის ინიციატორი საქართველოს მთავრობაა.