2010 წლის ნოემბერში უძრავი ქონების ბაზარზე სარეგისტრაციო ტრანზაქციათა რაოდენობა წინა თვესთან შედარებით 5.4%-ით გაიზარდა და ქვეყნის მასშტაბით 34 913 ერთეული შეადგინა.
საჯარო რეესტრის ეროვნული სააგენტოს ინფორმაციით, 2010 წელს უძრავი ქონების სარეგისტრაციო ტრანზაქციები წინა წლის იმავე თვესთან შედარებით გაიზარდა, იანვრის თვეში - 32.2%-ით, თებერვლის თვე-ში - 11.7%-ით, მარტის თვეში - 35.8%-ით, აპრილის თვეში - 40.1%-ით, მაისის თვეში - 52.8%-ით, ივნისის თვეში - 30.9%-ით, ივლისის თვეში - 16.8%-ით, აგვისტოს თვეში - 13.3%-ით, სექტემბრის თვეში - 5.6%-ით, ოქტომბრის თვეში - 4.5%-ით, ნოემბრის თვეში - 18.4%-ით.
2010 წლის 11 თვის განმავლობაში განხორციელებული ტრანზაქციების რაოდენობა წინა წლის იმავე პერიოდის ინდიკატორს 22.0%-ით აღემატება და შეადგენს 360 369 ერთეულს (საშუალოდ თვეში 32 761 ერთეული), რაც 27 654 ერთეულით აღემატება 2009 წლის 12 თვის ინდიკატორს და 13 725 ერთეულით - 2008 წლის 12 თვის ინდიკატორს.
ნოემბრის თვეში სარეგისტრაციო ტრანზაქციების თვის ინდექსიც გაიზარდა და 1.126 დონეზე დაფიქსირდა, რაც წინა წლის იმავე თვის ინდექსს (0.951) აღემატება.
საჯარო რეესტრის ეროვნული სააგენტოს ინფორმაციით, აშკარაა, რომ უძრავი ქონების პირველადი და მეორადი ბაზრები გაიზარდა როგორც წინა თვესთან (შესაბამისად 0.3%-ით და 6.6%-ით), ისე წინა წლის იმავე თვესთან შედარებით (შესაბამისად 6.9%-ით და 21.2%-ით).
2010 წლის ნოემბრის თვეში პირველადი სარეგისტრაციო ტრანზაქციების რაოდენობამ - 6 133, ხოლო მეორადი სარეგისტრაციო ტრანზაქციების რაოდენობამ - 28 780 ერთეული შეადგინა; სარეგისტრაციო ტრანზაქციების თვის ინდექსი კი პირველადი და მეორადი სარეგისტრაციო ტრანზაქციების მიხედვით შესაბამისად 0.659 და 1.326 დონეებზე დაფიქსირდა.