ეკონომიკის სამინისტრო ტურისტულ ცენტრებში სანიტარულ-ჰიგიენური პირობების გაუმჯობესებას იწყებს.
ამ მიზნით ვერა ქობალიას უწყება ტურისტულ ცენტრებში ვიზიტორთათვის სანიტარულ-ჰიგიენური ობიექტების მშენებლობისა და ექსპლუატაციის შესახებ ინტერესთა გამოხატვის მიზნით ფიზიკურ და იურიდიულ პირებს იწვევს.
შეთავაზებული პირობების თანახმად, ინვესტორს სიმბოლურ ფასად - 1 ლარად გადაეცემა მიწის ნაკვეთები ობიექტის მშენებლობისა და ექსპლუატაციისთვის; ინვესტორმა უნდა უზრუნველყოს სანიტარული ობიექტის (საპირფარეშო) აშენება და სათანადო ინფრასტრუქტურით (წყალი, ელეტროენერგია) აღჭურვა.
ობიექტების ექსპლუატაციაში შესვლის ვადა ხელშეკრულების გაფორმებიდან 120 კალენდარული დღეა.
ამასთან, ინვესტორს უფლება აქვს, იქონიოს ბლოკირებული მაღაზია სუვენირების, ჰიგიენის საშუალებების, გამაგრილებელი სასმელების და სხვა ქარხნულად შეფუთული პირველადი მოთხოვნილების პროდუქციის გასაყიდად.
თითოეული ლოტი შედგება 4 მეტად მონახულებადი ისტორიული ძეგლისგან, რომელთა მიმდებარე ტერიტორიაზე უნდა განთავსდეს სანიტარული ობიექტი.
პირველ ლოტში შედის დავით გარეჯი, ანანური, გრემი, ჯვარი. მეორე ლოტი - ძველი შუამთა, ვარძია, გელათი, იყალთო.