სავაჭრო ცენტრ "ქარვასლაში" "ჯი.მარტის" ქვებრენდის სახით, სწრაფი კვების ობიექტი "პანორამა ბუფეტი" გაიხსნა.
"პანორამა ბუფეტი" ღია ტიპის კაფეა, რომლის მომხმარებლებსაც საშუალება აქვთ კერძის დამზადებაში მონაწილეობა თავად მიიღონ.
კაფის გახსნა მენეჯმენტს ნახევარი მილიონი ევრო დაუჯდა. დასაქმებულია 70 ადამიანი. კვების წარმოების ხაზი სპეციალურად მოწვეულმა უცხოელმა სპეციალისტმა ააწყო. იქ ყველა ტიპის სამზარეულოა წარმოდგენილი, მათ შორის მზადდება ევროპული და აზიური კერძები.
"პანორამის" პირველი მომხმარებლები მასმედიის წარმომადგენლები იყვნენ. დილიდან მათთვის საგანგებოდ მოეწყო კერძების დეგუსტაცია და სახალისო "პანორამა-ტურნირი", 13:00 საათიდან კი ობიექტმა პირველი მომხმარებლების მიღება დაიწყო.
"პანორამა ბუფეტი" "ჯი.მარტის" ახალი ბრენდია. ობიექტი "ქარვასლაში" მეხუთე სართულზე მდებარეობს.
"ჯი.მარტი" ქართული კაპიტალით შექმნილი ქსელია, რომელიც ამ ეტაპზე მოიცავს მსხვილი ფორმატის სუპერმარკეტებს "ქარვასლასა" და "თბილისი ცენტრალში", თუმცა უახლოეს მომავალში ქსელი თბილისის ცენტრალურ უბნებშიც გაფართოვდება.