24-25 ნოემბერს ომისა და მშვიდობის გაშუქების ინსტიტუტი (IWPR) აწყობს ჟურნალისტურ მისიას ფოთში, სადაც იძულებით გადაადგილებულ პირთათვის ახალი კომპაქტური დასახლება შენდება. პროექტი ახალი საცხოვრებლით 12 ათასი იძულებით გადაადგილებული პირის უზრუნველყოფას ითვალისწინებს, რომლებსაც თავიანთი სახლების დატოვება 1991-1992 წლების კონფლიქტების და 2008 წელს რუსეთ-საქართველოს ომის დროს მოუწიათ. დევნილების ჩასახლება 2011 წლის გაზაფხულზე დაიწყება.
მისიის მიზანი პროექტის დეტალების ადგილზე გაცნობა და მასში ჩართულ მხარეებთან შეხვედრაა. მისია ხელს შეუწყობს მომავალში ისეთი საკითხების საჯარო განხილვას, როგორიცაა ინტეგრაცია, ჯანდაცვის, დასაქმების და სხვა მნიშვნელოვანი პრობლემების მოგვარება, რომლებსაც დევნილები აწყდებიან.
მისია პროექტის ნაწილია, რომელიც მიზნად რეგიონული ჟურნალისტების ქსელის შექმნას და მათი პროფესიული უნარ-ჩვევების ამაღლებას ისახავს. მისიაში მონაწილეობას ქვემო ქართლის მედია ჯგუფის, რადიო "ქალაქის" (შიდა ქართლი), "ახალი გაზეთის" (იმერეთი), სააგენტო "ჯეოტოპნიუსის", მე-9 არხის (სამცხე-ჯავახეთი), გაზეთ "ბათუმელების" (აჭარა), და გაზეთ "რეზიუმეს" (ფოთი) ათი ჟურნალისტი მიიღებს.
ჟურნალისტები შეხვდებიან ფოთის მერს ვახტანგ ლემონჟავას, დევნილთა საქალაქო სამსახურის, აფხაზეთის მთავრობის და ადგილობრივი არასამთავრობო ორგანიზაციების წარმომადგენლებს.
მისიის შედეგად რეგიონული მედიასაშუალებებისთვის რეპორტაჟების სერია მომზადდება.
მისია პროექტის Building Bridges/Building Capacity in the South Caucasus ფარგლებში ტარდება, დიდი ბრიტანეთის და ნორვეგიის საგარეო საქმეთა სამინისტროების დაფინანსებით.
ომისა და მშვიდობის გაშუქების ინსტიტუტი არის არასამთავრობო ორგანიზაცია, რომელიც კონფლიქტურ და კრიზისულ რეგიონებში მუშაობს მედიის განვითარებისა და თავისუფალი სიტყვის ხელშეწყობისათვის. ცხრა რეგიონული პროგრამის ფარგლებში IWPR თავის პროექტებს ოცზე მეტ ქვეყანაში ახორციელებს.