საქართველოში პირველად გამოვიდა სპეციალური საგანმანათლებლო საჭიროებების მქონე მოსწავლეთა შემოქმედებითი კრებული.
ბროშურის "ინკლუზიური განათლება - განსაკუთრებული ბავშვების განსაკუთრებული ავტოპორტრეტები" პრეზენტაცია დღეს გაიმართა.
პრეზენტაციას საქართველოს განათლებისა და მეცნიერების მინისტრი დიმიტრი შაშკინი დაესწრო.
ბროშურა 198-ე საჯარო სკოლის მოსწავლეების ჩანაწერების, ლექსებისა და პატარა მოთხრობების მცირე კრებულია.
ბროშურა მოამზადა და გამოსცა სამინისტროს ეროვნული სასწავლო გეგმებისა და შეფასების ცენტრმა ბრიტანეთის საბჭოსთან თანამშრომლობით.
დიმიტრი შაშკინმა აღნიშნა, რომ ახლოწარსულში ტაბუდადებული - „აუტისტური სპექტრის მქონე" მოსწავლეთა შემოქმედების გაცნობა საზოგადოებას დაეხმარება ჩაწვდნენ ამ ბავშვების შინაგან სამყაროს, გაიგონ რა აწუხებთ, რას განიცდიან, რა ინტერესები და შესაძლებლობები გააჩნიათ მათ.
ქ. თბილისის 198 საჯარო სკოლაში 150 მოსწავლე სწავლობს. მოსწავლეთა 10% სოციალურად დაუცველია, დანარჩენი 90% სპეციალური საჭიროების მქონეა. უმრავლესობას მეტყველების, მოტორიკის, ემოციური, თუ სოციალური კომუნიკაციის პრობლემები აწუხებთ, უჭირთ ფიზიკური თუ ფსიქიკური სტაბილობის დაცვა, ურთიერთობა უფროსებთან თუ თანატოლებთან.
