საქართველოს სტატისტიკის ეროვნული სამსახურის შენობა აუქციონზე გაიყიდება. შენობაზე დღეს სპეციალური აბრა გამოიკრა და სამინისტროს პრივატიზების დეპარტამენტის პრეს სპიკერმა გიორგი კალანდაძემ ბრიფინგი გამართა.
პეკინის ქუჩა #4-ში მდებარე შენობის საწყისი გასაყიდი ფასი 3 მილიონ 600 ათასი დოლარია. კალანდაძის განცხადებით, შენობას აქვს ხელსაყრელი ადგილმდებარეობა და განვითარებული ინფრასტრუქტურა.
"ეს არის 6 ათასამდე კვადრატული მეტრი საოფისე და სავაჭრო ფართი. საზოგადოებრივი და საკუთარი პარკირების ადგილებით. დედაქალაქის ბიზნეს და კულტურულ ცენტრებთან სიახლოვეში შენობის მომავალი მყიდველი ბიზნესის განვითარებისთვის საუკეთესო პირობებს ქმნის" - აღნიშნა კალანდაძემ.
დაინტერესებულ პირთა განცხადები ეკონომიკისა და მდგრადი განვითარების სამინისტროში დღეიდან 30 ნოემბრის ჩათვლით მიიღება. ერთადერთი საპრივატიზაციო პირობა არის ის რომ მესაკუთრეს შენობა გადაეცემა ეტაპობრივად და ეს პროცესი 2011 წლის 1 მაისს დასრულდება.