გიორგაძის თქმით, იგი დაიბარეს განათლების სამინისტროს გენერალურ ინსპექციაში, სადაც ირაკლი ანდრიაძემ სკოლის დატოვება და შესაბამის დოკუმენტზე ხელის მოწერა მოსთხოვა. გიორგაძის თქმით, გენერალურ ინსპექციაში ამის მიზეზად 149-ე საშუალო სკოლის მოსწავლეების გუშინდელ საპროტესტო აქციაში მონაწილეობა დაასახელეს.

"შენნაირი დირექტორი სკლოაში არ უნდა იყოს, მითხრა ირაკლი ანდრიაძემ", - "ჯი-ეიჩ-ენთან" საუბარში აღნიშნავს გიორგაძე.

მისი თქმით, 149-ე საშუალო სკოლის მაღალი კლასების მოსწავლეებს პარლამენტის წინ გამართულ საპროტესტო აქციაში მონაწილეობა არ მიუღიათ.

"სამინისტროში წაღებული მქონდა საკლასო ჟურნალები, სადაც დაფიქსირებულია, რომ ბავშვები მიტინგის დროს გაკვეთილებზე იმყოფებოდნენ, რაც შეეხება მოსწავლეების იმ მცირე რაოდენობას, რომელიც სკოლაში ობიექტური მიზეზების გამო არ მოვიდნენ, მათი მშობლების ახსნა-განმარტებითი ბარათებიც მაქვს", - "ჯი-ეიჩ-ენთან" საუბარში აღნიშნავს გიორგაძე.

მისი თქმით, იგი სკოლის დირექტორის თანამდებობის დატოვებას არ აპირებს, რადგან საქმეში თავის ბრალეულობას ვერ ხედავს.

შეგახსენებთ, რომ დღეს, თბილისის 8 საშუალო სკოლის დირექტორმა თანამდებობა დატოვა. თანამდებობიდან გათავისუფლებულები არიან 173-ე სკოლის დირექტორი მზია გიორგობიანი, 161-ე სკოლის დირექტორი მიშა მინდაძე, 151-სკოლის დირექტორი ეკატერინე ხუციშვილი, 117-ე სკოლის დირექტორი დალილა ზუხბაია, 58-ე სკოლის დირექტორი დავით ფაღავა, 63-ე სკოლის დირექტორი ზანა მონიავა, 2-ე სკოლის დირექტორი ლია სოღოლაშვილი და 149-ე სკოლის დირექტორი მაია გიორგაძე.
ასევე "ჯი-ეიჩ-ენის" ინფორმაციით, თანამდებობიდან გაათავისუფლეს 124-ე საჯარო სკოლის დირექტორი ელენე შაბურიშვილი.

განათლების მინისტრმა დიმიტრი შაშკინმა 23-ე სკოლაში სტუმრობისას დაადასტურა, რომ თბილისის 8 საშუალო სკოლის დირექტორი თანამდებობიდან გათავისუფლებულია.

შაშკინის მტკიცებით, დირექტორებმა აღნიშნული გადაწყვეტილება თავად მიიღეს და თანამდებობებიც საკუთარი სურვილის საფუძველზე დატოვეს.