ამ დღეებში ქართულ ბაზარზე საქონლის ხორცის ფასი 20-დან 25 პროცენტამდე გაიაფდება.
ამ განცხადებას სოფლის მეურნეობის მინისტრი ბაკურ კვეზერელი აცხადებს.
მინისტრის თქმით, ბოლო პერიოდში საქონლის ხორცის ბაზარზე მისი ფასი ხელოვნურად იქნა გაზრდილი, რაზეც სახელმწიფო ადეკვატურ ზომებს მიიღებს რათა საბოლოო ჯამში მომხმარებლის ინტერესები არ დაირღვეს.
"ხორცის ბაზარზე ადმინისტრირება გავამკაცრეთ, რასაც ზოგიერთი არაკეთილსინდისიერის მხრიდან მოყვა ხორცის ფასების ხელოვნური ზრდა, მაგრამ ჩვენ ყველაფერს გავაკეთებთ იმისთვის, რომ ეს რგოლი მოვაშოროთ და ხორცის ფასი ძველ მაჩვენებელს დაუბრუნდეს. ბაზარზე არსებული საქონლის ხორცის ფასები არის ხელოვნური და ჩვენ შევისწავლით ყველა იმ რგოლს რომელმაც ხელოვნურად გააძვირა ხორცის ღირებულება," - განაცხადა კვეზერელმა.
მინისტრის თქმით, მას შემდეგ, რაც ძალაში შევიდა აკრძალვა და თბილისის მასშტაბით გასაყიდი სარეალიზაციო ხორცის დაკვლა და მისი დამუშავება ლიცენზირებულ სასაკლაოებში გახდა აუცილებელი, ამის შემდეგ გადამყიდველებმა საუბარია 70-მდე ინდ მეწარმეზე, ხორცის ფასი ხელოვნურად გააძვირეს.
მინისტრი არაკეთილსინდისიერი მეწარმეების სქემასაც შიფრავს და აცხადებს, რომ ადრე როდესაც გლეხს უნდოდა, საქონლის ხორცის გაყიდვა საქონელს ყიდულობდა მეორე ადამიანი, რომელსაც დაკლული საქონლის ხორცი მიჰქონდა ან რაიონულ ბაზარში ან უშუალოდ ჩამოჰქონდა თბილისში არაჰიგიენურ პირობებში და ღამით ხდებოდა ვაჭრობა ხორცზე. დილით კი უკვე მეორე რგოლი ერთვებოდა ამ საქმეში და ეს მეორე რგოლი ხორცით ამარაგებდა სარეალიზაციო ქსელებს ანუ მაღაზიებს. ამის შემდეგ კი ხორცის ფასი კიდევ იზრდებოდა, რადგან მაღაზიაც მოგების მიზნით გარკვეულ საფასურს უმატებდა ხორცს.
ამიერიდან ხორცის დაკვლა მოხდება მხოლოდ სასაკლაოებზე, სადაც ცოცხალი ხორცი დაახლოებით 2,50 ლარიდან 3,50 ლარამდეა ხარისხის მიხედით, ხოლო დამუშავებისა და გადამუშავების შემდეგ სასაკლაოდან გამოტანილი ხორცის ღირებულება 7,40 ლარს შეადგენს.
მინისტრის განმარტებით, მომავალი კვირიდან ხორცის ბაზარზე ფასების დასტაბილურებას გამოიწვევს ისიც, რომ თავად ნატახტარში მდებარე სასაკლაოს მფლობელი კომპანია იბეროლა შემოვა ბაზარზე, რომელიც თბილისის მასშტაბით რამდენიმე სუპერმარკეტს გახსნის სადაც ხორცის ღირებულება სასაკლაოდან გამოტანილი საქონლის ხორცის ღირებულების ტოლფასი იქნება.
შესაბამისად, იბეროლას სუპერმარკეტებში ხორცის ღირებულება დაბალი იქნება და სხვა მეწარმეები კონკურენციის გამო ხორცის ფასს აღარ გაზრდიან.
მინისტრი პირობას დებს, რომ ნოემბერსა და დეკემბერში ხორცის ფასი უპრეცენდენტოდ დაბალი იქნება.
როგორც ბაკურ კვეზერელი განმარტავს საქონლის ხორცთან დაკავშირებით ამოქმედებული გამკაცრებული ადმინისტრირების შემდეგ გამკაცრებული ადმინისტრირება ამოქმედდება ღორისა და ცხვრის ხორცის ექსპორტთან მიმართებაში.შეგახსენებთ, რომ სოფლის მეურნეობის სამინისტრო ადმინისტრირებას საქონლის ხორცთან მიმართებაში 2010 წლის 18 ოქტომბრიდან აამოქმედა, რომლის შემდეგაც ბაზარზე საქონლის ხორცის ღირებულებამ თითქმის 14 ლარს მიაღწია.