ათასწლეულის ფონდის აგრობიზნესის განვითარების პროექტის ფარგლებში, შიდა ქართლის რეგიონში ორი ახალი ცენტრი იხსნება.
ფერმერთა მომსახურების ახალი ცენტრის გახსნა 118 ათას 210 დოლარი დაჯდა, საიდანაც 49 ათას 700 დოლარი აგრობიზნესის პროექტის გრანტია, ხოლო 68 ათას 510 დოლარი ცენტრის მეპატრონის მიერ გაღებული ინვესტიციაა. ფერმერთა მომსახურების ახალი ცენტრი ფერმერებს ვეტერინარული მედიკამენტებით, მცენარეთა დაცვის საშუალებებით, მანქანა-დანადგარებითა და მცირე იარაღებით, აგრეთვე, კვალიფიციური ტრენინგებითა და კონსულტაციებით, უზრუნველყოფს. აღნიშნული ფერმერთა მომსახურების ცენტრი, სადაც 10 ახალი სამუშაო ადგილი შეიქმნა, მიმდებარე ტერიტორიაზე მცხოვრებ 3000-მდე ფერმერს მოემსახურება.
მექანიზაციის ახალი ცენტრი მშენებლობა კი 263 ათას 980 ლარი დაჯდა, საიდანაც ათასწლეულის ფონდის აგრობიზნესის პროექტმა 149 ათას 980 დოლარი გასცა, ხოლო ცენტრის მეპატრონემ პროექტი 114 ათასი დოლარით დააფინანსა.
მექანიზაციის ცენტრში, განთავსებულია მანქანათა დასაყენებელი ღია და დახურული მოედნები, სამრეცხაო, ელექტრომექანიკური საამქრო, საწყობი და ადმინისტრაციული შენობა. მექანიზაციის ახალ ცენტრში 9 ახალი სამუშაო ადგილი შეიქმნა. ეს ცენტრი იმავე ტერიტორიაზე მდებარეობს, სადაც ათასწლეულის ფონდის აგრობიზნესის განვითარების პროექტის ფარგლებში დაარსებული ფერმერთა მომსახურების ცენტრია. აღნიშნული ცენტრი 2007 წლიდან წარმატებულად ემსახურება ამ რეგიონში მცხოვრებ 13,000-მდე ფერმერს.
ათასწლეულის ფონდის აგრობიზნესის განვითარების პროექტის ფარგლებში სულ დამტკიცებულია 286 პროექტი პირველადი წარმოების, მცირე და საშუალო საწარმოებისა და ფერმერთა მომსახურების ცენტრების განვითარებისთვის საქართველოს ყველა რეგიონში, საერთო თანხით 16.2 მლნ. აშშ დოლარი, რაც, სავარაუდოდ, 3,600-მდე ახალი სამუშაო ადგილის შექმნის წინაპირობაა საქართველოს რეგიონებში.