კომპანია "თელიანი ველის" მთლიანი შემოსავალი, 2010 წლის მესამე კვარტალში, გასული წლის ანალოგიურ პერიოდთან შედარებით, 46%-ით გაიზარდა და 4.9 მლნ ლარი შეადგინა.
"ბი ჯი კაპიტალი"-ის ინფორაციით, კომპანიის ებიტდა 35%-ით გაიზარდა 0.8 მლნ ლარამდე. კომპანიის კვარტალურმა წმინდა მოგებამ 0.3 მლნ ლარი შეადგინა მაშინ, როდესაც გასული წლის მესამე კვარტალში კომპანიას მცირე ზარალი ჰქონდა. მიმდინარე წლის 9 თვის განმავლობაში ებიტდა 19%-ით გაიზარდა გასული წლის ანალოგიურ პერიოდთან შედარებით და 2.1 მლნ ლარი შეადგინა, ხოლო ებიტდა-ს მარჟამ 2%-ით 17%-მდე დაიკლო, რადგანაც გაყიდული პროდუქციის თვითღირებულების ზრდამ შემოსავლების ზრდას გადააჭარბა.
"2010 წლის 9 თვის განმავლობაში, დისტრიბუცია და იმპორტიდან მიღებულმა შემოსავალმა კომპანიის საკუთარი პროდუქციის გაყიდვიდან მიღებულ შემოსავალს გადააჭარბა. დისტრიბუციიდან მიღებული შემოსავალი 61%-ით გაიზარდა მესამე კვარტალში, რაც ძირითადად განაპირობა არყის გაყიდვიდან მიღებული შემოსავლების მკვეთრმა ზრდამ. ჩვენი პროგნოზით, კომპანიის 2010 წლის შემოსავალი 16 მლნ ლარს შეადგენს, ხოლო წმინდა მოგება დადებითი იქნება"- აცხადებს "ბი ჯი კაპიტალის" სააქციო კაპიტალის ბაზრის ანალიტიკოსი გიორგი ირემაშვილი.
შეგახსენებთ, რომ სს "ბი ჯი კაპიტალი" (ყოფილი "გალტ ენდ თაგგარტ სექიურითის"), წარმოადგენს საქართველოში მოწინავე საინვესტიციო ბანკს, რომელიც დაარსდა 2000 წელს. კომპანია სთავაზობს კლიენტებს სრულ საინვესტიციო საბანკო მომსახურებას განვითარებადი ბაზრის მქონე ქვეყნებში და ყოფილ საბჭოთა კავშირის რესპუბლიკებში, ძირითადად საქართველოში, უკრაინასა და ბელარუსიაში. კომპანიის საქმიანობის პრიორიტეტული მიმართულებებია საბროკერო მომსახურება აქციებისა და ობლიგაციების შეძენაში, კვლევების ჩატარება, და კლიენტებისათვის საინვესტიციო კაპიტალის მოზიდვა.
2010 წელს, პრესტიჟულმა გამომცემლობამ, Euromoney"-მ, სს "ბი ჯი კაპიტალი" დაასახელა როგორც განვითარებად ბაზრებზე მოქმედი საუკეთესო საინვესტიციო ბანკი ცენტრალურ და აღმოსავლეთ ევროპაში.
სს "ბი ჯი კაპიტალი"-ს 100% წილის მფლობელია სს "საქართველოს ბანკი".