შემოსავლების სამსახური დღგ-ს გადამხდელებს ახალ პროდუქტს სთავაზობს. ამიერიდან კომპანიებს საშუალება ექნებათ ისარგებლონ "ელექტრონული საგადასახადო ანგარიშ-ფაქტურით".
როგორც შემოსავლების სამსახურის უფროსმა გიორგი ცხაკაიამ განაცხადა, ხშირი იყო შემთხვევები როდესაც ანგარიშ ფაქტურა ყალბდებოდა რაც ამა თუ იმ კომპანიას გარკვეულ ზიანს აყენებდა. ხოლო ახალი სერვისის დანერგვის შემდეგ ის იქნება საკმაოდ დაცული და გაყალბება მთლიანად იქნება აღმოფხვრილი.
"ძალიან ბევრი შეცდომის დაშვება ხდებოდა ანგარიშფაქტურების შევსებისას. იყო მისი გაყალბების მცდელობებიც რაც კომპანიებს გარკვეულ ზარალს აყენებდა და მათ პრობლემები ექმნებოდათ. ახალ სერვისის დანერგვის შემდეგ კომპანიას უმცირდება ხარჯები და აღრიცხვიანობა უფრო მარტივი ხდება", - განაცხადა გიორგი ცხაკაიამ. შემოსავლების უფროსის განმარტებით, აღნიშნული სერვისის პრეზენტაციები საქართველოს მასშტაბით ყველა რეგიონში მოეწყობა რისთვისაც შემოსავლების სამსახური რეგიონებში საკუთარი სერვისების პრეზენტაციას გამართავს.
"ელექტრონული საგადასახადო ანგარიშ-ფაქტურების" - სისტემის დანერგვით კმაყოფილია თავად ბიზნესიც. როგორც ვისოლის გენერალურმა დირექტორმა ვასილ ხორავამ განაცხადა მისი კომპანიისათვის ამ სერვისის ამოქმედება მნიშვნელოვანია და ის კომპანიას დაუზოგავს დროს, რაც თავისთავად ხარჯებთანაცაა დაკავშირებული. "აღრიცხვის მოწესრიგებასთან ერთად მოწესრიგდება ქაღალდბრუნვა და ქაღალდბრუნვისათვის აღარ იქნება ის დრო საჭირო რაც აქამდე იყო და დროის დაზოგვა კი ნებისმიერი კომპანიისათვის მნიშვნელოვანია" - განაცხადა ვასილ ხორავამ. "ელექტრონული საგადასახადო ანგარიშ-ფაქტურის" სისტემის დანერგვას მიესალმებიან ხორცპროდუქტების მწარმოებელ კომპანია "იორშიც". როგორც კომპანიის წარმომადგენელი ქეთევან ამანათაშვილი განმარტავს, ასეთი სერვის შეთავაზება ბიზნესისთვის მნიშვნელოვანია. რაც თითოეულ კომპანიას ადმინისტრირებას გაუმარტივებს და საგადასახადო სისტემასთან ურთიერთობა უფრო გაიოლებული ფორმით მოხდება.
შემოსავლების სამსახურში განმარტავენ რომ საგადასახადო პროცედურების გამარტივება აღნიშნული მომსახურეობით ბიზნეს სექტორს უფრო დაცულს გახდის, რაც უზრუნველყოფს რისკების მინიმუმამდე დაყვანას. ელექტრონული ანგარიშფაქტურების დახმარებით მცირდება მისი გაყალბების შანსი. ბიზნეს პარტნიორები ოპერატიულად ცვლიან ინფორმაციას, ავტომატურ რეჟიმში ახდენენ ფაქტურების დაწყვილებას და მის აღრიცხვას.