2011 წელს სოფლის მეურნეობის სამინისტროს დაფინანსება დაახლოებით 40 მლნ ლარით იზრდება.
როგორც სოფლის მეურნეობის მინისტრმა ბაკურ კვეზერელმა განაცხადა, სამინისტროს დაფინანსება 2011 წლისთვის რამოდენიმე ათეული მლნ. ლარით გაიზრდება, რაც მიმდინარე პროექტების გარდა, ახალი პროექტების შექმნასა და დაფინანსებას მოხმარდება.
2010 წელს სოფლის მეურნეობის სამინისტროს ბიუჯეტი, დონორების დაფინანსების გარეშე, 13,7 მლნ ლარს შეადგენდა.
2011 წლის ძირითადი ფინანსური დოკუმენტის პროექტის მიხედვით, მთლიანი შიდა პროდუქტის ზრდა 4.5%-ით განისაზღვრა, ბიუჯეტის მთლიანი ხარჯები 6 მილიარდ 960 მილიონ ლარს შეადგენს. 5 მილიარდ 300 მილიონი ლარით განისაზღვრა საგადასახადო შემოსავლები, რაც მთლიანი ბიუჯეტის 76%-ს შეადგენს. სახელმწიფო ბიუჯეტის ხარჯები დაგეგმილია მშპ-ს 29%-ის ფარგლებში. ეტაპობრივად გაგრძელდება მისი შემცირება და 2013 წლისთვის იგი არ გადააჭარბებს მშპ-ს 25%-ს.
მნიშვნელოვანია, რომ მომავალი წლის ბიუჯეტში აისახა მთავრობის ე.წ ქამრების შემოჭერის პოლიტიკა და დოკუმენტში მნიშვნელოვნადაა შემცირებული ადმინისტრაციული ხარჯები.