1-ლი ოქტომბრიდან საქართველოს სტატისტიკის ეროვნული სამსახურის მაკროეკონომიკური სტატისტიკის სამმართველო, საგარეო ეკონომიკური საქმიანობის III კვარტლის გამოკვლევის საველე სამუშაოს იწყებს.
როგორც "ჯი-ეიჩ-ენს" სტატისტიკის ეროვნული სამსახურიდან (საქსტატი) აცნობეს, გამოკვლევას დაექვემდებარება ქვეყანაში მოქმედი ყველა სა¬წარ¬მო, რომელიც შეირჩევა შემდეგი კრიტერიუმების მიხედვით: საწარმოს ჰყავს არარეზიდენტი დამფუძნებელი; ახორციელებს ექსპორტ-იმპორტის ოპერაციებს; არარეზიდენტებისგან აქვს აღებული სესხი ან გაცემული მათზე; დეპოზიტები აქვს განთავსებული არარეზიდენტ ბანკებში; ფლობს არარეზიდენტი საწარმოს საწესდებო ან სააქციო კაპიტალის 10% და მეტს; არარეზიდენტებს უწევს ან მათგან იღებს მომსახურებას.
ამჟამად შერჩეულ საწარმოთა რიცხვი 1500 აღწევს. ზემოაღნიშნული გამოკვლევის საველე სამუშაოები მთელი თვის განმავლობაში გასტანს.
აღნიშნული გამოკვლევის შედეგად, საქსტატი არა უგვიანეს 2010 წლის 14 დეკემბრისა, გამოაქვეყნებს საქართველოში 2010 წლის III კვარტალში განხორციელებული პირდაპირი უცხოური ინვესტიციების მონაცემებს ქვეყნების, ეკონომიკის სექტორებისა და ინფორმაციის წყაროების ჭრილში.