აჭარაში კონტროლის პალატას ახალი ხელმძღვანელი ჰყავს. სულხან ჯორთმენაძის კანდიდატურა აჭარის ავტონომიური რესპუბლიკის უმაღლესმა საბჭომ უკვე დაამტკიცა.
აჭარის კონტროლის პალატის ახალი თავმჯდომარე სულხან ჯორთმენაძე 2008 წლიდან აჭარის ფინანსთა და ეკონომიკის მინისტრის მოადგილის თანამდებობაზე მუშაობს.
საქართველოს კონტროლის პალატის ინფორმაციით, აჭარის ავტონომიურ რესპუბლიკაში აქტიურად მიმდინარე საინვესტიციო საქმიანობის ფონზე, განსაკუთრებით მნიშვნელოვანია დაბანდებული ინვესტიციების სახელმწიფო ინტერესების შესაბამისად მართვისა და ხარჯვის ხელშემწყობი ღონისძიებების გატარება.
ამ მიმართულებით სახელმწიფო მხარდაჭერის უზრუნველსაყოფად არსებითი მნიშვნელობა აქვს საქართველოს კონტროლის პალატის, როგორც საფინანსო-ეკონომიკური კონტროლის უმაღლესი ორგანოს მიერ თავისი უფლებამოსილებების სანიმუშოდ შესრულებას, რასაც მიზნად ისახავს ამ უწყებაში მიმდინარე რეფორმა. კონტროლის პალატის ინფორმაციით, აღნიშნული ინსტიტუციური რეფორმის ნაწილია აჭარის ავტონომიური რესპუბლიკის კონტროლის პალატაში განსახორციელებელი სხვადასხვა, მათ შორის, საკადრო ცვლილებებიც.