მოსამართლე და იუსტიციის უმაღლესი საბჭოს წევრი, სერგო მეთოფიშვილი სასამართლო სისტემაში გატარებულ რეფორმებზე საუბრობს და ამბობს, რომ მნიშვნელოვანია, რომ საკანონმდებლო ინიციატივა კონსტიტუციასთან წინააღმდეგობაში არ მოდიოდეს. ეკა ბესელიას კი ტყუილსა და ორმაგი სტანდარტებით მოქმედებაში ადანაშაულებს.
„ორმაგი სტანდარტებით ხელმძღვანელობს. არ ერიდება ტყუილის თქმასაც, ცუდი ის არის, რომ უცხოელ პარტნიორებსაც ატყუებს. როგორც აწყობს ისე იქცევა. სინამდვილეში მას არ აინტერესებს სასამართლო, მას პრობლემა შეექმნა თავის პარტიაში და მოსამართლეების თემა ამოიდო იღლიაში და დაიწყო ლანძღვა-გინება. როგორც 2018 წელს ეკა ბესელიამ აშშ-ს საელჩოს პოლიტიკურ ოფიცერთან შეხვედრისას განაცხადა - 2012 წლის შემდეგ სასამართლო სისტემაში გატარებული რეფორმების შემდეგ მნიშვნელოვანი პროგრესი იქნა მიღწეული და სახეზეა დადებითი შედეგი. როგორ შეიძლება 2018 წელს მოსწონებოდა სასამართლო და დღეს აღარ მოსწონს,“ - ამბობს მეთოფიშვილი.
რაც შეეხება მოსამართლეების შერჩევის წესთან დაკავშირებულ კანონპროექტს, რომელზეც სამუშაო ჯგუფი მსჯელობდა, სერგო მეთოფიშვილის თქმით, მნიშვნელოვანია, რომ საკანონმდებლო ინიციატივა კონსტიტუციასთან წინააღმდეგობაში არ მოდიოდეს.