ვენესუელის დროებითმა პრეზიდენტმა ხუან გუაიდომ განაცხადა, რომ თუ ქვეყნის ხელისუფლება მას დააპატიმრებს, ამით ნიკოლას მადურო თავის უკანასკნელ შეცდომას დაუშვებს.
„თუ რეჟიმი გაბედავს და დამაპატიმრებს, ეს მისი უკანასკნელი შეცდომა იქნება“, - განაცხადა გუაიდომ.
მისი თქმით, დაპატიმრების შემთხვევაში მოკავშირეებს ზუსტი ინსტრუქციები გააჩნიათ. გუაიდო ვენესუელაში დაბრუნებას დღეს აპირებს.
ვენესუელის უზენაესმა სასამართლომ გუაიდოს ქვეყნის დატოვება აუკრძალა, თუმცა ის 22 თებერვალს მოსაზღვრე კოლუმბიის ქალაქ კუკუტაში ჩავიდა, სადაც ვენესულისთვის ჰუმანიტარული დახმარების ცენტრი მდებარეობს. ერთი კვირის განმავლობაში ის იმყოფებოდა კოლუმბიაში, ბრაზილიაში, პარაგვაიში, არგენტინასა და ეკვადორში.
ვენესუელის ეროვნულმა ასამბლეამ, რომელსაც ოპოზიცია აკონტროლებს, გუაიდოს ქვეყნის დატოვების უფლება ხუთ დღეზე მეტი ხნით მისცა.
