„ჩვენს მიერ წარდგენილ კანონპროექტს ექნება ყველა იმ ადამიანის მხარდაჭერა, რომლის ინტერესებშიც არის მართლმსაჯულების დამოუკიდებლობა, მათ შორის, ვგულისხმობ ჩვენს საერთაშორისო პარტნიორებს",- ამის შესახებ საქართველოს პარლამენტის თავმჯდომარემ უზენაესი სასამართლოს მოსამართლეობის კანდიდატთა შერჩევის პროცედურასა და კრიტერიუმებთან დაკავშირებულ კანონპროექტზე საუბრისას განაცხადა.
ირაკლი კობახიძის თქმით, გუშინ, დიპლომატიური კორპუსის, საპარლამენტო ოპოზიციის, სასამართლო ხელისუფლებისა და არასამთავრობო ორგანიზაციების წარმომადგენლებთან გამართულ შეხვედრაზე, წარდგენილ იქნა კანონპროექტი, რომელსაც სხვადასხვა დაინტერესებული მხარის მხარდაჭერა აქვს.
„ჩვენ შევთავაზეთ სხვადასხვა მხარეს შემდეგი პროცედურა: არის რამდენიმე ეტაპიანი პროცედურა, რომელიც არის ღია, გამჭვირვალე, არის საკუთარი სტრუქტურის მქონე, გაგრძელდება, მინიმუმ, ორ თვეს, და ეს ჩაივლის საზოგადოების ძალიან მყარი დაკვირვების ქვეშ, შესაბამისად, ეს ყველაფერი უზრუნველყოფს იმას, რომ საბოლოო ჯამში, იქნება მიღებული, ასე ვთქვათ, ხარისხიანი გადაწყვეტილება უზენაესი სასამართლოს მოსამართლეების არჩევასთან დაკავშირებით. ეს ყველაფერი არის უზრუნველყოფილი ჩვენი კანონპროექტით",- განაცხადა ირაკლი კობახიძემ.
მისივე თქმით, კანონპროექტთან დაკავშირებით, სამი ძირითადი შენიშვნა გამოითქვა, რაზეც, მსჯელობა გაგრძელდება.
ჟურნალისტებთან საუბრისას, პარლამენტის თავმჯდომარე გამოეხმაურა კოალიციის - „დამოუკიდებელი და გამჭვირვალე მართლმსაჯულებისთვის" წარმომადგენლის, გიორგი მშვენიერაძის მიერ შეხვედრის დატოვებას. მისი შეფასებით, არასამთავრობო ორგანიზაცია არ უნდა მონაწილეობდეს პოლიტიკურ სპექტაკლებში და არ უნდა ჰქონდეს პოლიტიკური ინტერესი.
„ გიორგი მშვენიერაძე იყო პირდაპირ ჩართული, მაგალითად, წინასაარჩევნო კამპანიაში სალომე ზურაბიშვილის წინააღმდეგ. ამ ადამიანის და შესაბამისად, ამ ძალების პოლიტიკური ინტერესი არის თვალსაჩინო - ისინი იბრძოდნენ პრეზიდენტის ინსტიტუტისთვის საპრეზიდენტო არჩევნების დროს, ისინი იბრძვიან ამ შემთხვევაშიც, კონკრეტული პოლიტიკური ინტერესებიდან გამომდინარე და მე შეგახსენებთ, რომ ვიდრე გააკეთებდა განცხადებას გიორგი მშვენიერაძე სხდომის დატოვების შესახებ, მას უკვე დილას ჰქონდა განცხადება გაკეთებული იმის თაობაზე, რომ მოგვიანებით დატოვებდა სხდომას, არაპირდაპირი ფორმით, ის მოუწოდებდა, ასევე, სხვა მხარეებს, მათ შორის, საერთაშორისო პარტნიორებს, რომ არ მიეღოთ მონაწილეობა ამ სამუშაო პროცესში. ეს არის, ბუნებრივია, პოლიტიკური სპექტაკლი და როდესაც გეწოდება არასამთავრობო ორგანიზაცია, ბუნებრივია, არ უნდა მონაწილეობდე პოლიტიკურ სპექტაკლებში, და არ უნდა გქონდეს პოლიტიკური ინტერესი, მით უმეტეს, იმ პოლიტიკური ძალის მიმართ, რომელიც ჩადიოდა იმ დანაშაულებს, რომელიც ჩაიდინა იმ ძალამ, განსაკუთრებით, ადამიანის უფლებების დარღვევის კუთხით",- განაცხადა ირაკლი კობახიძემ.
მან კიდევ ერთხელ აღნიშნა, რომ ამოცანაა მკაფიო პროცედურებისა და კრიტერიუმების გაწერა, რასაც მმართველი გუნდი უზრუნველყოფს.
„ჩვენი ამოცანა არის ის, რომ გავწეროთ მკაფიო პროცედურები და კრიტერიუმები და ეს იქნება უზრუნველყოფილი ჩვენს მიერ და საბოლოო ჯამში, ეს უზრუნველყოფს იმას, რომ მიღებული იქნება ისეთი გადაწყვეტილება უზენაესი სასამართლოს მოსამართლეების არჩევასთან დაკავშირებით, როგორიც არის ქვეყნის ინტერესებში და არა გიორგი მშვენიერაძის და „ნაციონალური მოძრაობის" ინტერესებში",- განუცხადა პარლამენტის თავმჯდომარემ ჟურნალისტებს.
მისივე თქმით, კანონპროექტის მიმართ, საერთო დამოკიდებულება დადებითია და გამოთქმულ შენიშვნებზე მუშაობა გაგრძელდება.
„დარწმუნებული ვართ, რომ ამ სამ საკითხზეც გვექნება შეთანხმება და შესაბამისად, ეს კანონპროექტი იქნება მიღებული ფართო მხარდაჭერით. ბუნებრივია, ამ კანონპროექტს ვერ ექნება „ნაციონალური მოძრაობის", გიორგი მშვენიერაძის და სხვა მსგავსი წარმომადგენლების მხარდაჭერა, თუმცა, ამას ექნება ყველა იმ ადამიანის მხარდაჭერა, რომლის ინტერესებშიც არის მართლმსაჯულების დამოუკიდებლობა, მათ შორის, ვგულისხმობ ჩვენს საერთაშორისო პარტნიორებს და ყველა იმ სუბიექტს, რომელიც იყო გუშინ წარმოდგენილი ჩვენს შეხვედრაზე",- აღნიშნა ირაკლი კობახიძემ.