"ადამიანებს, რომლებიც ჩართული არიან საოჯახო სასტუმროების ქსელში წყლის ტარიფი შესაძლოა 13-ჯერ გაუძვირდეთ" - აცხადებს ევროპული საქართველოს წევრი აკაკი ბობოხიძე.
აკაკი ბობოხიძე ოჯახური ტიპის სასტუმროს მფლობელებისთვის წყლის ტარიფის გაზრდას აპროტესტებს და განმარტავს, რომ საბოლოო გადაწყვეტილება მარეგულირებელმა კომისიამ ერთ თვეში უნდა მიიღოს, რის შემდეგაც სასტუმროს მფლობელებს კომერციული ფართებისთვის დაწესებული ტარიფის გადახდა მოუწევთ, რაც საყოფაცხოვრებო ტარიფს 13-ჯერ აღემატება.
აკაკი ბობოხიძის შეფასებით, გადასახადების მატება ოჯახური სასტუმროების ბიზნესისთვის დამღუპველი იქნება.
"ევროპული საქართველოს’’ წევრის აკაკი ბობოხიძის განცხადებით - ‘’ „როგორც ცნობილია, საქართველოში არსებობს ორი ტიპის გადასახადები, საყოფაცხოვრებო და არასაყოფაცხოვრებო ტარიფი. კონკრეტულად წყალთან დაკავშირებით, მათ შორის განსხვავება ძალიან მაღალია. საქართველოში არის ძალიან დიდი ქსელი საოჯახო სასტუმროებისა, რომლებშიც დასაქმებული არის ოჯახების ძალიან დიდი ნაწილი და კონკრეტულად თბილისში. სემეკ-ში დაყენებული მოთხოვნა, რომ საოჯახო სასტუმროები განხილული იყოს როგორც კომერციული ობიექტები და მათ დაუწესდეთ წყლის ტარიფი არასაყოფაცხოვრებო წესით, დაკმაყოფილების შემთხვევაში გამოიწვევს კატასტროფულ შედეგებს ამ სფეროში, ამ ადამიანებს წყლის ტარიფი გაუძვირდებათ 13-ჯერ, ხოლო თუ ეს პრეცედენტი დაშვებული იქნება თბილისში, არ გამოვრიცხავ, რომ მსგავსი ტიპის მოთხოვნები დადგეს სრულიად საქართველოს მასშტაბით. გაუგებარია რანაირად შეიძლება ერთსა დ იმავე ბინაში, რომელიც ერთდროულად არის საცხოვრებელიც და საოჯახო ტიპის სასტუმროც, განვასხვავოთ ერთმანეთისგან, როდის მოიხმარენ წყალს საკუთარი მოხმარებისთვის და როდის სტუმრები. ეს ცვლილება მიღების შემთხვევაში დამღუპველი აღმოჩნდება საქართველოში იმ უზარმაზარი სეგმენტისთვის, რომელსაც წარმოადგენს საოჯახო ტურიზმი“, - განაცხადა აკაკი ბობოხიძემ.
