ბათუმის მერიის ინფორმაციით, უკანონო გარევაჭრობისგან ქალაქის ქუჩების გათავისუფლება გრძელდება. ძველი ბათუმის ადმინისტრაციულ ერთეულში, მუნიციპალური სერვისების სააგენტოს მონიტორინგის ჯგუფის მიერ, გაფრთხილებები უკვე დაურიგდათ ქუთაისისა და ზ. გამსახურდიას ქუჩებზე არსებული კომერციული ობიექტების მეპატრონეებს.
ისინი ვალდებულები არიან, 3 დღის ვადაში მოაწესრიგონ როგორც გარე რეკლამის განთავსების სანებართვო პირობების დარღვევები, ასევე, საზოგადოებრივი ადგილებით სარგებლობის თვითნებური შეზღუდვა. უკანონო გარევაჭრობა უკვე აღმოიფხვრა წერეთლის ქუჩასა და მის მიმდებარე ტერიტორიაზე, ჭავჭავაძისა და ლერმონტოვის ქუჩების კვეთასა და აღმაშენებლის ქუჩაზე. გარევაჭრობის დახლების აღებამდე მერიის წარმომადგენლების მხრიდან მოხდა გარემოვაჭრეების გაფრთხილება. შეთანხმებისამებრ, საკუთარი პროდუქციის რეალიზების მიზნით გარემოვაჭრეები ალტერნატიულ ტერიტორიაზე გადავიდნენ.