პროკურატურის მიერ თიბისი ბანკის მიმართ დაწყებულმა გამოძიებამ არარსებულ საქმეზე ხელი ინვესტიციების განხორციელებას შეუშალა, - განაცხადა თიბისი ბანკის დამფუძნებელმა დღევანდელ პრესკონფერენციაზე, ჟურნალისტის შეკითხვაზე - ხომ არ უკავშირდება ბანკის მიმართ დაწყებული გამოძიება ანაკლიის პორტს.
„იმ დაჩქარებულმა გამოძიებამ, რომელიც დაიწყო პროკურატურამ და იმ ინფორმაციის გაჟონვებმა, რომელიც საერთაშორისო პრესაში მოხვდა, თითქოს მე და ბადრის რაღაც კავშირი გვაქვს დანაშაულთან, პირდაპირ ურტყამს იმ ხელშეკრულების გაფორმების პროცედურას. როგორ წარმოგიდგენიათ, რომელი საფინანსო ინსტიტუტი მოაწერს ხელს იმ საფინანსო ინვესტორთან და კომპანიის თავმჯდომარესთან, რომელთანაც პარალელურად იხსნება ე.წ არარსებული საქმე", - თქვა ხაზარაძემ.
მისივე თქმით, ამ საკითხთან დაკავშირებით სახელმწიფო მათ გვერდში უდგას, სახელმწიფოს ერთ-ერთი სტრუქტურა კი მის მიმართ გამოძიებას იწყებს, რაც შემაშფოთებელია.
„მთელი გულწრფელობით ვლაპარაკობ, არც ანაკლიას ვეფარებით და არც ბანკს. მინდა, ხაზგასმით გითხრათ, ჩვენი სამართალი და პატიოსნება არის თქვენ წინ. უკვე მაისში და ივნისში უნდა მივიღოთ ერთ-ერთი ყველაზე დიდი დაფინანსების წყარო, ექვსი მსოფლიოს წამყვანი საფინანსო ინსტიტუტიდან. 600 მილიონ დოლარზეა საუბარი. საქმე აღარ ეხება „თიბისი ბანკსა“ და კონკრეტულ ადამიანებს, საქმე ეხება ქვეყანას, ჩვენს პერსპექტივას, მომავალს. ამიტომ ვთხოვ ყველას, დროზე გაერკვეს სიტუაციაში, დროზე დაიხუროს არარსებული თემები, რათა დავუბრუნდეთ საქმეს“,- განაცხადა მამუკა ხაზარაძემ.