ევროკავშირსა და ნატო-ში გაწევრიანების არჩევანი არ არის მხოლოდ პოლიტიკური; ეს ჩემი ერის ცივილიზაციური და ღირებულებებით გაჯერებული არჩევანია, - ამ სიტყვებით მიმართა საქართველოს პრემიერ-მინისტრმა მამუკა ბახტაძემ ნატო-ს გაფართოების საკითხებისადმი მიძღვნილ მრგვალ მაგიდაზე შეკრებილ სტუმრებს, რომელთა შორის მიუნხენის უსაფრთხოების კონფერენციის თავმჯდომარე ვოლფგანგ იშინგერი, ნატოს გენერალური მდივნის მოადგილე როუზ გოტმიოლერი,ჩრდილოეთ მაკედონიის თავდაცვის მინისტრი რადმილა შეკერინსკა და საექსპერტო წრეების ცნობილი წარმომადგენლები იმყოფებოდნენ.
მთავრობის მეთაურმა მათ საქართველოს მხარდაჭერისა და მეგობრობისთვის მადლობა გადაუხადა და აღნიშნა, რომ ნატოში გაწევრიანება საქართველოს საგარეო პოლიტიკის უპირველეს პრიორიტეტად რჩება.
“ცივი ომის დასრულების შემდეგ ნატო-ს გაფართოება გადამწვეტი იყო აღმოსავლეთ ევროპის ქვეყნებში უსაფრთხოების შექმნის, მშვიდობიანი და დემოკრატიული განვითარების უზრუნველყოფაში. გვახარებს ის ფაქტი, რომ ღია კარის პოლიტიკა კვლავ მუშაობს და ხელშესახები შედეგები მოაქვს იმ ერებისთვის, რომლებსაც ალიანსში გაწევრიანება სურთ და ამისთვის არანაირ რესურსს არ ზოგავენ”, - განაცხადა მამუკა ბახტაძემ.
პრემიერმა ჩრდილოეთ მაკედონიის რესპუბლიკას მიულოცა ისტორიული მიღწევა, რომელიც ერთი კვირის წინ გაწევრიანების პროტოკოლის ხელმოწერით აღინიშნა და ასევე მიესალმა სხვა ერებისთვის გაწევრიანების მკაფიო პერსპექტივის გაჩენას.
“ასპირანტი ქვეყნის - საქართველოსთვის წამახალისებელია დასავლეთ ბალკანეთის ასპირანტი ქვეყნების წარმატება და იმედს ვიტოვებთ, რომ ეს პროცესი მოახდენს ნატოში ჩვენი ინტეგრაციის სტიმულირებასაც. ნატოში გაწევრიანება საქართველოს საგარეო პოლიტიკის უპირველეს პრიორიტეტად რჩება. ეს არის ჩვენი არჩევანი და ის საერთო ფასეულობებს ეფუძნება, ისევე როგორც საზოგადოების ძალიან მაღალ და თანმიმდევრულ მხარდაჭერას საქართველოს ნატოში გაწევრიანებასთან დაკავშირებით. საკუთარ მომავალს ევროპის და ნატოს ფარგლებში ვხედავთ და ჩემი მთავრობა ყველაფერს აკეთებს იმისთვის, რომ ამ პროცესში კიდევ უფრო დავწინაურდეთ. ბუქარესტის სამიტზე 2008 წელს მიღებული ისტორიული გადაწყვეტილების შემდეგ დიდი გზა გავიარეთ. დღეს საქართველო სტაბილური დემოკრატიაა ძლიერი სახელმწიფო ინსტიტუტებით, აქტიური სამოქალაქო საზოგადოებითა და თავისუფალი მედიით. ჩვენი რეფორმები ფართოდ მიიჩნევა სამაგალითოდ და ჩვენი პარტნიორები მოიხსენიებენ საქართველოს, როგორც ნატო-ს ასპირანტ ქვეყნებს შორის მოწინავე პოზიციებზე მყოფ სახელმწიფოს. ჩვენი თავდაცვის ძალები ნატოსთან თავსებადობის მაღალ ნიშნულზეა. ალიანსის და ჩვენი სტრატეგიული პარტნიორების დახმარებით ვაგრძელებთ თავდაცვისუნარიანობის შემდგომ გაძლიერებას. ნატოს ასპირანტი ქვეყნის და სანდო პარტნიორის რანგში, საქართველო განაგრძობს თავისი წვლილის შეტანას საერთო ევროატლანტიკურ უსაფრთხოებაში. მტკიცედ გვჯერა, რომ ჩვენი მიღწევები გარდაიქმნება ხელშესახებ ნაბიჯებად და საქართველო კიდევ უფრო დაუახლოვდება ნატოში გაწევრიანებას”, - განაცხადა მამუკა ბახტაძემ.
პრემიერ-მინისტრმა აღნიშნა, რომ მოკავშირეების შეფასებით, საქართველოს ყველა პრაქტიკული ინსტრუმენტი გააჩნია საბოლოო გაწევრიანებისთვის.
მთავრობის მეთაურმა ასევე ყურადღება გაამახვილა ნატოსთან ყოვლისმომცველ პოლიტიკურ დიალოგზე და არაერთი მიმართულებით არსებულ შესანიშნავ პრაქტიკულ თანამშრომლობაზე.
“ამავდროულად, წინ უნდა გავიხედოთ და დავაჩქაროთ ჩვენი ინტეგრაციის პოლიტიკური ნაწილი. საქართველოს ნატო-სთან კიდევ უფრო მეტი სიახლოვე დაგვეხმარება ევროატლანტიკურ სივრცეში საერთო უსაფრთხოების მნიშვნელოვან გაუმჯობესებაში, რაც თანაბრად შეეხება ნატოს წევრ სახელმწიფოებსა და პარტნიორ ქვეყნებს. საქართველო არის შავი ზღვის და უფრო ფართო ევროატლანტიკური რეგიონის უსაფრთხოების განუყოფელი ელემენტი. ქვეყნის მნიშვნელობა გაიზრდება მხოლოდ რეგიონული პროექტების განხორციელების კვალდაკვალ, რაც ამჟამად ინიცირდება. ნატოში გაწევრიანება საქართველოსთვის კრიტიკული მნიშვნელობისაა, თუმცა თავად ნატოს ინტერესებშია, ქვეყანა მიუახლოოს ალიანსში გაწევრიანების ეტაპს. ჩვენი მოსაზრებით, დროა, ნაბიჯები გადაიდგას ამ მიმართულებით, რადგან ამის "შესაძლებლობათა ფანჯარა" ღიაა. ყოყმანი არ დაგვეხმარება გამოწვევებთან გამკლავებაში. ნატოს გაფართოება ევროპაში კიდევ უფრო მეტად გაზრდილი მშვიდობისა და უსაფრთხოებისთვის ყველაზე გამართლებული ვარიანტია. საქართველოს შესაშური ძალისხმევა ამის ძალიან მყარ საფუძველს იძლევა. დარწმუნებული ვარ, მოკავშირეებთან, პარტნიორებთან და მეგობრებთან ერთად ვიპოვით გზებს არსებული გამოწვევების გადასალახად და საქართველოს გაწევრიანების პროცესს მნიშვნელოვნად ავიყვანთ უფრო მაღალ და მდგრად დონეზე. მსურს, კიდევ ერთხელ გავიმეორო, რომ ევროკავშირსა და ნატოში გაწევრიანება არ არის მხოლოდ პოლიტიკური არჩევანი. ეს ჩემი ერის ცივილიზაციური, ღირებულებებით გაჯერებული არჩევანია. მადლობას გიხდით საქართველოს ძლიერი მეგობრობისთვის”, - მიმართა პრემიერ-მინისტრმა მრგვალი მაგიდის სტუმრებს.
ღონისძიებაზე, რომელიც მიუნხენის უსაფრთხოების უსაფრთხოების 55-ე კონფერენციის ფარგლებში, საქართველოს თავდაცვისა და უსაფრთხოების კონფერენციის თანაორგანიზებით გაიმართა, საქართველოს ნატო-ში ინტეგრაციის პოლიტიკური და პრაქტიკული ასპექტები მიმოიხილეს საქართველოს საგარეო საქმეთა მინისტრმა დავით ზალკალიანმა და თავდაცვის მინისტრმა ლევან იზორიამ. მრგვალი მაგიდის მონაწილეებს ასევე იტყვით მიმართეს ელჩმა იშინგერმა და ჩრდილოეთ მაკედონიის თავდაცვის მინისტრმა.
