დღეს, დონალდ ტრამპი კონგრესში ყოველწლიურ მიმართვას გააკეთებს. ტრამპის ყოველწლიური მიმართვა კონგრესში 29 იანვარს იყო დაგეგმილი, თუმცა პრეზიდენტმა გამოსვლის თარიღი მთავრობის მუშაობის ნაწილობრივი შეჩერების, ე.წ. „შათდაუნისა“ და თეთრ სახლსა და კონგრესს შორის არსებული საბიუჯეტო კრიზისის გამო გადადო.
ტრამპის გადაწყვეტილებას წინ უძღოდა აშშ-ის წარმომადგენელთა პალატის სპიკერის, ნენსი პელოსის წერილი პრეზიდენტისადმი, სადაც ის წერს, რომ წარმომადგენელთა პალატას არ შეუძლია განიხილოს რეზოლუცია პრეზიდენტის კონგრესში მიწვევის შესახებ, სანამ სრულად არ აღდგება მთავრობის საქმიანობა.
თეთრი სახლის განცხადებით, პრეზიდენტი დღევანდელ მიმართვაში ყურადღებას გაამახვილებს იმიგრაციაზე, ჩინეთთან მიმდინარე სავაჭრო მოლაპარაკებებზე, ჯანდაცვასა და საგარეო ომების დასრულების აუცილებლობაზე.
შეგახსენებთ, რომ თეთრმა სახლმა და კონგრესმა დროებით შეთანხმებას მიაღწიეს მთავრობის საქმიანობის განახლების შესახებ. ეს იმას ნიშნავს, რომ ტრამპმა ხელი მოაწერა მოკლევადიანი დაფინანსების დოკუმენტს, რომლის მოქმედებაც 15 თებერვლამდე გაგრძელდება.
2018 წლის 22 დეკემბრიდან აშშ-ის მთავრობის მუშაობა ნაწილობრივ დახურული იყო. დონალდ ტრამპი კონგრესისგან ამერიკა-მექსიკის საზღვარზე კედლის ასაშენებლად დაფინანსებას ითხოვს, დემოკრატები კი პრეზიდენტის ამ მოთხოვნას კატეგორიულად არ ეთანხმებიან.