გრძელდება ცნობილი პოლიტიკური ფიგურების მიერ წარმოებული პოლიტიკის იმიტირებული სასამართლო პროცესები, საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის მულტიდისციპლინური სამეცნიერო თეორიულ-პრაქტიკულ ღონისძიებათა პროექტის „პოლიტიკა სამსჯავროზე“ ფარგლებში. სამსჯავროზე გადის არა პიროვნება, არამედ წარმოებული პოლიტიკა, რამდენად შეესაბამებოდა ეროვნულ ინტერესებს. ამჯერად, სამსჯავროზე წარდგება ლავრენტი ბერიას მიერ საქართველოში განხორციელებული პოლიტიკა.
ერთმანეთს შეეჭიდება ბრალდების გუნდი ,,VENI, VIDI, VICI" და დაცვის გუნდი ,,ისტორიის მეოხი“, ხოლო სასამართლო კოლეგია გამოიტანს განაჩენს თუ რომელი გუნდი გაიმარჯვებს არგუმენტების ბრძოლაში.
იმიტირებული სასამართლო პროცესი გაიმართება 2019 წლის 25 იანვარს, 13 საათზე, საქართველოს ტექნიკური უნივერსიტეტიის ადმინისტრაციულ კორპუსში, გ. ნიკოლაძის დარბაზში.
პოლიტიკოსები, რომელთა პოლიტიკაც ასევე გავა სამსჯავროზე: ნოე ჟორდანია, ზვიად გამსახურდია, ერეკლე მე-2, გიორგი სააკაძე, გიორგი მე-12, ვახტანგ მე-6, თეიმურაზ პირველი, ლაშა-გიორგი, ლუარსაბ მე-2, ვასილ მჟავანაძე, სოლომონ მე-2, სტალინი, ედუარდ შევარდნაძე და სხვ. უცხოელებიდან, მაგალითად, განზრახულია ბრიტანელ სტუდენტებთან ერთად დევიდ ლოიდ ჯორჯის (დიდი ბრიტანეთის პრემიერ-მინისტრი 1916-1922) პოლიტიკის გატანა სამსჯავროზე. პროექტის მონაწილეებს სურთ გაარკვიონ თუ რა როლი ითამაშა მან საბჭოთა რუსეთის მიერ 1921 წლეს საქართველოს დემოკრატიული რესპუბლიკის დაპყრობაში და სხვ.
ფაკულტეტის დეკანი, პროფესორი ირაკლი გაბისონია: სტუდენტებს აინტერესებთ არა მხოლოდ თანამედროვე, არამედ განვითარების ყველა მნიშვნელოვან ისტორიულ მონაკვეთში საქართველოს ხელისუფლების მიერ წარმოებული პოლიტიკა. სურთ ობიექტურად გაანალიზონ დადებითი და უარყოფითი სვლები; შეძლონ გარჩევა იმისა თუ მათ პოლიტიკაში, რომელი სჭარბობდა სახელმწიფო თუ პირადი ინტერესები; უნდათ პოლიტიკის ანალიზში სახელმწიფოებრივი აზროვნება დომინირებდეს; უნდათ ისწავლონ შეცდომებზე, რათა თვითონ აღარ გაიმეორონ.
პროექტის ავტორი, სტუ-ს პროფესორი ჰენრი კუპრაშვილი: მინდა ხაზგასმით აღვინშნო, რომ რომელიმე გუნდი, თუ ვერ გავიდა შემდგომ ეტაპზე, ეს არ ნიშნავს წაგებას, რადგან ამ პროექტის არსი არ იძლევა ამის საშუალებას. ჩვენი უნივერსიტეტის გარდა პროექტში ერთ გუნდად შეკრულები იღრმავებენ პროფესიულ ცოდნასა და უნარ-ჩვევებს სხვადასხვა უმაღლესი სასწავლებელბის (თსუ-ს, სეუ-ს, გაუს-ს და სხვ.) სწავლების სხვადასხვა საფეხურზე მყოფი სტუდენტები. პროექტს წაგებულები არ ჰყავს. პროექტში მონაწილეობით სტუდენტებმა ხომ სასწავლო და სამეცნიერო თეორიულ-პრაქტიკული სინთეზისა და უნივერსალიზაციის შედეგად ერთობლივად გაიღრმავეს პროფესიული ცოდნა და ამასთან ერთად, განივითარეს კრეატიული და ანალიტიკური აზროვნება, ჩამოიყალიბეს თანამშრომლობის და გუნდური მუშაობის, საჯარო გამოსვლების, დებატების, სასამართლო პროცესებზე მონაწილეობის უნარ-ჩვევები, დაეუფლნენ მოლაპარაკებების ხელოვნებას და სხვ. ეს ყველაფერი კი საწინდარია იმისა, რომ მათგან მაღალი დონის, მარავალმხრივ განვითარებული კვალიფიციური სპეციალისტი დადგება.
მეტად რთული იმიტირებული სასამართლო პროცესი გველის. დარწმუნებული ვარ, რომ მაღალკვალიფიციური, პოლიტიკაში თეორიულ-პრაქტიკული დიდი გამოცდილების მქონე ჟიური, რომელიც დღეს ჩვენი მომავალი თაობის პროფესიულ სრულყოფაში იღებს აქტიურ მონაწილეობას, გადაწყვეტილებას მიიღებს ობიექტურად, მხოლოდ პროცესის მსვლელობის შედეგად მიღებული ინფორმაციისა და გუნდების მომზადების შესაბამისად. მჯერა, რომ ჟიურის თითოეული წევრის გადაწყვეტილებაზე გავლენას ვერ მოახდენს კონკრეტული პოლიტიკური პირის მიმართ მათი წინასწარი დამოკიდებულება. ჟიურის შემადგენლობაშია სტუ-ს პროფესორები, საპარლამენტო ლეგიტიმაციის მქონე პარტიების წარმომადგენლები და სხვ.
