კიევის ობოლონსკის რაიონულმა სასამართლომ უკრაინის ყოფილი პრეზიდენტი ვიქტორ იანუკოვიჩი სახელმწიფო ღალატში დამნაშავედ სცნო.
სასამართლომ სახელმწიფო ღალატის შესახებ საქმის განხილვა 2017 წლის ივნისში დაიწყო. ეს სისხლის სამართლის ერთ-ერთი საქმეა, რომელიც უკრაინის ახალმა ხელისუფლებამ სახელმწიფოს ყოფილი მეთაურის წინააღმდეგ დაიწყო.
პროკურატურა იანუკოვიჩისთვის უვადო პატიმრობის შეფარდების მოთხოვნას აპირებდა, თუმცა მოგვიანებით ბრალდებამ ყოფილი პრეზიდენტისთვის 15-წლიანი პატიმრობა მოითხოვა. იანუკოვიჩი ბრალს კატეგორიულად უარყოფს.
ვიქტორ იანუკოვიჩს განაჩენი დაუსწრებლად გამოუტანეს, რადგან ის უკრაინაში 2014 წლიდან არ იმყოფება.
