22 იანვარს, მთელ მსოფლიოში საფრანგეთის და გერმანიის საელჩოები ფრანგულ-გერმანულ დღეს ზეიმობენ. საქართველოში, საფრანგეთის ელჩი, მ.ა. ბ-ნი პასკალ მენიე და მისი გერმანელი კოლეგა, მ.ა. ბ-ნი ჰუბერტ ქნირში ერთობლივად აღნიშნავენ ამ მნიშვნელოვან მომენტს, ერთად ეწვევიან რა კავკასიის ფრანგულ სკოლასა და თბილისის საერთაშორისო გერმანულ სკოლას. ამ სტუმრობის მიზანია, ახალგაზრდების წინაშე აღინიშნოს საფრანგეთისა და გერმანიის შერიგების მნიშვნელობა ორი ქვეყნის ურთიერთობებში, და ამავდროულად, მისი როლი ევროპის მშენებლობის ისტორიაში და მსოფლიოში მშვიდობის სასარგებლოდ. სკოლებში ვიზიტი, ასევე, მიზნად ისახავს, ყველა სფეროში ორი ქვეყნის დიპლომატიური და კულტურული წარმომადგენლობების მჭიდრო ურთიერთობებისა და მათ მიერ საქართველოში, როგორც აღმოსავლეთ პარტნიორობის წევრ ქვეყანაში, ერთობლივად განხორციელებული პროექტების უკეთ გაცნობას.
ფრანგულ-გერმანული დღე, რომელიც ყოველწლიურად აღინიშნება, 1963 წლის 22 იანვარს, გენერალ შარლ დე გოლს, საფრანგეთის რესპუბლიკის პრეზიდენტსა და კონრად ადენაურს, გერმანიის ფედერაციული რესპუბლიკის კანცლერს შორის ფრანგულ-გერმანული თანამშრომლობის ხელშეკრულების, ეგრეთწოდებული ელისეის ხელშეკრულების ხელმოწერის გახსენებაა.
ელისეის ხელშეკრულებაზე დამატებით, 2019 წლის 22 იანვარს, ხელი მოეწერება აახენის ხელშეკრულებას, რომლის მიზანიცაა მისი თანამედროვე გამოწვევებთან შესაბამისობა, ფრანგული და გერმანული საზოგადოებების დაახლოების გაგრძელება და ფრანგულ-გერმანულ ურთიერთობებში პარლამენტების როლის გაძლიერება.