კერძო სექტორი კარგად იყენებს თავისუფალი ვაჭრობის შეთანხმებათა უპირატესობებს, რაც დადებითად აისახება ექსპორტის ზრდაზე. საქართველოს საგარეო ვაჭრობის სტატისტიკური მონაცემები მეტყველებს, რომ გაზრდილია საქართველოს ეკონომიკა, როგორც წარმოების ასევე, მოხმარების ნაწილში, - განაცხადა თსუ ანალიზისა და პროგნოზირების ცენტრის გამგეობის თავმჯდომარე ოთარ ანგურიძე. მისი თქმით, თავისუფალი ვაჭრობის შეთანხმებები ასევე ხელს უწყობს მსოფლიო ბაზრებზე ქართული პროდუქციის კონკურენტუნარიანობის ზრდას.
„საქსტატის“ ცნობით, 2018 წელს საქართველოს საგარეო სავაჭრო ბრუნვა გაიზარდა 17 პროცენტით და შეადგინა 12 484.4 მლნ. აშშ. დოლარი. საქონლით საგარეო სავაჭრო ბრუნვამ 12 484.4 მლნ. აშშ დოლარი შეადგინა, რაც წინა წლის შესაბამის მაჩვენებელს 17.0 %-ით აღემატება. აქედან, ექსპორტმა 3 362.1 მლნ. აშშ დოლარი შეადგინა და გაიზარდა 22.9 %-ით. რაც შეეხება იმპორტს, მისმა მაჩვენებელმა 9 122.3 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 14.9 %-ით მეტია.
2018 წელს, საქართველოდან ევროკავშირის ქვეყნებში განხორციელდა 730.3 მლნ აშშ დოლარის ექსპორტი, რაც 11.5%-ით მეტია წინა წლის ანალოგიურ მაჩვენებელზე. ევროკავშირის ქვეყნებში განხორციელებული ექსპორტმა მთლიანი ექსპორტის 21.7% შეადგინა. ხოლო ევროკავშირის ქვეყნებიდან იმპორტმა შეადგინა 2629.1 მლნ აშშ დოლარი. რაც 19.5%-ით მეტია წინა წლის ანალოგიურ მაჩვენებელზე.
ექსპორტის მნიშვნელოვანი ზრდა დაფიქსირდა შემდეგ ქვეყნებზე: აზერბაიჯანში (84.7%), სომხეთსა (35.5%),ბულგარეთში (38.5%), უკრაინაში (40.6%) და ყაზახეთში (75.4%).