ჩვენ გვყავს ხელისუფლება, რომლის ერთადერთი საბაზისო და ერთადერთი ინსტინქტი არის გაიშვიროს ხელი წინამორბედისკენ, - განაცხადა თბილისის ყოფილმა მერმა გიგი უგულავამ დღეს გამართულ ბრიფინგზე თბილსის მერის, კახა კალაძის განცახდების საპასუხოდ. კალაძემ დღეს თქვა, რომ წინა ხელისუფლების დამსახურებაა რა მდგომარეობაშიცაა დღეს დედაქალაქი. მისი თქმით, გააუქმეს რეგულაციები, ამოიღეს კანონიდან მნიშვნელოვანი შემაფერხებელი რეგულაციები. საუბარია, 2009 წლის საკანონმდებლო ცვლილებებზე, რომლის შედეგად ექსპლუატაციაში მიღების გარეშე შენობაში ცხოვრების აკრძალვა გაუქმდა.
„დღეს ჩვენ ვიხილეთ ბატონი მერისგან გაშვერილი ხელი, თითქოს 2009 წელს შეიცვალა კანონი და ამ კანონის საფუძველზე არ არის კავშირში ერთმანეთთან შენობის ექსპლუატაციაში მიღება და იქ კომუნალური სერვისების შეყვანა. დიახ, ეს ასეა, დიახ, ეს სწორია და დიახ, უმრავლეს ქვეყნებში შენობის ექსპლუატაცია არ არის დაკავშირებული კომუნალური სერვისების იქ შეყვანასთან და ეს სწორია. აი, აქ უნდა დაესვა ბატონ კალაძეს წერტილი, მაგრამ, სამწუხაროდ, მან, როგორც სჩვევია, გამოავლინა პოლიტიკური ცვედნობა და კვლავ ხელი გაიშვირა წინა ხელისუფლებისკენ“, - განაცხადა უფულავამ/
მისი თქმით, თუ ეს კანონი არ ვარგოდა, 7 წელიწადია ქართული ოცნება ხელისუფლებაშია და თუ მაინცა და მაინც ცვლილებაა საჭირო, შეეცვალა.
„მაგრამ აქ ცვლილება არ არის საჭირო, აქ პრობლემა არის იმაში, რომ ჩვენ გვყავს ხელისუფლება, რომლის ერთადერთი საბაზისო და ერთადერთი ინსტინქტი არის გაიშვიროს ხელი წინამორბედისკენ; გაიშვიროს ხელი ნებისმიერი ადამიანისკენ, ოღონდ კი თვითონ არ იყოს პასუხისმგებელი რამეზე. და როდესაც ხელისუფლება პასუხისმგებლობას არ იღებს არაფერზე, ის ხელისუფლება ვერასდროს მოგვიტანს ჩვენ სიკეთეს, ვერასდროს მოუტანს კახი კალაძე სიკეთეს თბილისელებს, იმიტომ, რომ ერთი დღეც კი ვერ გაძლო პოლიტიკური კინკლაობის და პოლიტიკური გადაბრალების გარეშე“, - განაცხადა უგულავამ.