Facebook-მა თავისი სოციალური ქსელიდან და Instagram-დან რუსეთთან დაკავშირებული და პროპაგანდისთვის გამოყენებული 364 გვერდი და ანგარიში წაშალა. ამის შესახებ Facebook-ის კიბერუსაფრთხოების ოფისის ხელმძღვანელმა ნათანიელ გლეიჰერმა განაცხადა.
„როგორც აღმოვაჩინეთ, რუსეთიდან მოდიოდა ორი ოპერაცია: ერთ-ერთი მათგანი ტარდებოდა რიგ ქვეყნებში, მეორე კი მხოლოდ უკრაინაში. ამ ოპერაციებში გამოყენებული იყო მსგავსი ტაქტიკა - შეექმნათ ანგარიშების ქსელი, რათა დაემალათ მათი წარმომავლობა და მიზნები“, - ნათქვამია გლეიჰერის განცხადებაში.
განცხადების თანახმად, პირველი ოპერაცია ეხებოდა ბალტიის ქვეყნებს, ცენტრალურ აზიას, კავკასიას, ცენტრალურ და აღმოსავლეთ ევროპას. ამ ქმედებების წინააღმდეგ Facebook-მა წაშალა 364 გვერდი და ანგარიში. მათი თემატიკა იყო ნატო-ს კრიტიკა, პროტეტსები და კორუფციის პრობლემები.
Facebook-ის შეფასებით ამ გვერდებთან დაკავშირებულ პუბლიკაციებზე 135 ათასი დოლარი დაიხარჯა. პუბლიკაციები 2013 წლის ოქტომბრიდან 2019 წლის იანვრამდე ქვეყნდებოდა.
მეორე ოპერაციის დროს, რომელიც უკრაინას ეხებოდა, ფეიკგვერდების საშუალებით ვრცელდებოდა ინფორმაციები ნატო-ს, საპროტესტო აქციებისა და ჯანდაცვის შესახებ. 2018 წლის იანვრიდან დეკემბრამდე ამ გვერდებზე განთავსებული პუბლიკაციებისთვის 25 ათასი დოლარი იყო გამოყოფილი.
