ევროკავშირი ბრექსიტისგან ზიანის მინიმიზაციას ცდილობს და დიდი ბრიტანეთის პრემიერ ტერეზა მეისგან ახალ წინადადებებს ელოდება, მას შემდეგ რაც მის გეგმას ევროკავშირიდან გასვლის შესახებ პარლამენტმა მხარი არ დაუჭირა. ამის შესახებ გერმანიის კანცლერმა ანგელა მერკელმა განაცხადა.
„ველოდებით, რომ ბრიტანული მხარე იტყვის თუ რას გააკეთებს მომავალში. პრემიერმა ეს უკვე დააანონსა. გვსურს ბრექსიტისგან მიყენებული ზიანის მინიმიზაცია, რომელიც ნებისმიერ შემთხვევაში დადგება. სწორედ ამიტომ შევეცდებით ვიმუშაოთ თანმიმდევრულ გამოსავალზე“, - განაცხადა მერკელმა.
კანცლერის თქმით, გერმანია სხვადასხვა სცენარისთვის მზად იყო, მათ შორის ევროკავშირიდან შეთანხემბის გარეშე დიდი ბრიტანეთის გასვლასთან დაკავშირებითაც. მისივე თქმით, კანონების პაკეტი, რომელიც ამასთან დაკავშირებით გერმანიამ მიიღო, ბუნდესტაგის მთავარი თემა იქნება.
„ჩვენ კიდევ გვაქვს დრო მოლაპარაკებებისთვის, მაგრამ ველოდებით ბრიტანეთის პრემიერის წინადადებებს“, - დასძინა მერკელმა.
ბრექსიტის დოკუმენტის შესახებ კენჭისყრა ბრიტანეთის პარლამენტში გუშინ, 15 იანვარს გაიმართა. 432-მა დეპუტატმა ხმა დოკუმენტის წინააღმდეგ მისცა, ხოლო 202-მა კი მხარი დაუჭირა მთავრობის გეგმას ევროკავშირიდან გასვლის შესახებ.
დღეს, 16 იანვარს, დიდი ბრიტანეთის პარლამენტში ქვეყნის პრემიერ-მინისტრის ტერეზა მეის უნდობლობის საკითხზე იმსჯელებენ. საკითხი ოპოზიციური პარტიის, ლეიბორისტიების ლიდერმა ჯერემი კორბინმა დააყენა დღის წესრიგში.
უფრო დეტალურად ბრექსიტისა და კენჭისყრის ჩავარდნის შემდეგ მოსალოდნელი პროცესების შესახებ იხილეთ ლინკზე - რა არის ბრექსიტი და რა იქნება მისი მოსალოდნელი შედეგები.