საქართველოს პარლამენტმა მიიღო ახალი კონსტიტუცია, რომელიც უპრეცედენტო გარანტიებს ქმნის სასამართლო სისტემის დამოუკიდებლობისთვის, თუმცა დღეს გვესმის სინანულის ტონით გაკეთებული განცხადებები და ვფიქრობ, ეს ძალიან არასწორია, - ამის შესახებ იუსტიციის უმაღლესი საბჭოს მდივანმა გიორგი მიქაუტაძემ განაცხადა.
მისი თქმით, უზენაესი სასამართლოს მოსამართლეობის კანდიდატებთან დაკავშირებით, როგორც დაანონსებულია, უახლოეს მომავალში გაიმართება შეხვედრა ფართო ჩართულობით, სადაც დაზუსტდება დეტალები კრიტერიუმებთან მიმართებაში.
"რაც შეეხება მიმდინარე პროცესებს, მინდა განვაცხადო, რომ ბოლო პერიოდში განხორციელდა არაერთი რეფორმა, რათა სასამართლო სისტემას ჰქონოდა რეალური დამოუკიდებლობა, რაც მიღწეულია. საქართველოს პარლამენტმა მიიღო ახალი კონსტიტუცია, რომელიც უპრეცედენტო გარანტიებს ქმნის სასამართლო სისტემის დამოუკიდებლობისთვის, თუმცა დღეს გვესმის სინანულის ტონით გაკეთებული განცხადებები და ვფიქრობ, ეს ძალიან არასწორია" , - განაცხადა მიქაუტაძემ.
მიქაუტაძის თქმით, მოსამართლეების შერჩევასთან დაკავშირებული კონკურსის საკითხებზე მსჯელობა გაიმართება. მისივე თქმით, უნდა დაკონკრეტდეს, რას გულისხმობს კონკურსი.