ბესელიას, ფოფხაძეს და მათ თანამოაზრე პოლიტიკოსებს რეალურად არ აინტერესებთ ქვეყნის სასამართლოს დამოუკიდებლობა, - ამის შესახებ იუსტიციის უმაღლესი საბჭოს მოსამართლე წევრი სერგო მეთოფიშვილი სოციალურ ქსელში გედევან ფოფხაძის განცხადებასთან დაკავშირებით წერს.
მისი თქმით, მათ მხოლოდ ერთი მიზანი აინტერესებთ – სასამართლო სისტემაში გავლენების მოპოვება და სასამართლოს მათდამი ლოიალურად განწყობილი და მორჩილი კადრებით დაკომპლექტება.
"აღარც კი მალავს [გედევან ფოფხაძე], რომ მას და მის თანამოაზრე პოლიტიკოსებს ჰქონდათ გეგმა, რომლის მიხედვით იუსტიციის უმაღლეს საბჭოზე უნდა დაწესებულიყო პოლიტიკური კონტროლი!
მეტი რა უნდა თქვან და გააკეთონ იმისათვის, რომ საზოგადოება დარწმუნდეს, რომ ბესელიას, ფოფხაძეს და მათ თანამოაზრე პოლიტიკოსებს რეალურად არ აინტერესებთ ქვეყნის სასამართლოს დამოუკიდებლობა! არ აინტერესებთ თანამედროვე დემოკრატიული ქვეყნების პრაქტიკა! არ აინტერესებთ ვენეციის კომისიის რეკომენდაციები! არ აინტერესებთ საკუთარი ქვეყნის კონსტიტუცია! არ აინტერესებთ ხელისუფლების დანაწილების პრონციპი!
მათ მხოლოდ ერთი მიზანი აინტერესებთ – სასამართლო სისტემაში გავლენების მოპოვება და სასამართლოს მათდამი ლოიალურად განწყობილი და მორჩილი კადრებით დაკომპლექტება!
ამას სასამართლო სისტემა უცხოელ პარტნიორებთან ერთად არ დაუშვებს!", – წერს მეთოფიშვილი.
ცნობისთვის, გედევან ფოფხაძემ გადაცემაში "კავკასიის" ეთერში განაცხადა, რომ ის, ეკა ბესელია, ზაქარია ქუცნაშვილი და "თავისუფალი დემოკრატები" ამბობდნენ, რომ სასამართლო რეფორმა უნდა დაწყებულიყო მხოლოდ მაშინ, როდესაც იუსტიციის უმაღლეს საბჭოზე პოზიტიური პოლიტიკური კონტროლი განხორციელდებოდა.
