იუსტიციის საბჭოს არამოსამართლე წევრი ნაზი ჯანეზაშვილი უზენაესი სასამართლოს დაკომპლექტების საკითხთა დაკავშირებით ყოფილ მოსამართლეებს ხვდება.
ნაზი ჯანეზაშვილის განცხადებით, მას სურს ყოფილი მოსამართლეებისგან მოისმინოს რჩევები მოსამართლეების უვადოდ არჩევის პროცედურებთან დაკავშირებით.
მისივე თქმით, ბევრმა მათგანმა საკუთარ თავზე გამოსცადა ის მანკიერი პრაქტიკა და წნეხი, რომელსაც დღეს კლანი ახორციელებს.
„ყოფილი მოსამართლეების ხმა უნდა ისმოდეს, რადგან ისინი არიან ადამიანები, რომლებიც 10 წლის განმავლობაში, ან მეტი წლის განმავლობაში, მუშაობდნენ სასამართლო სისტემაში და ძალიან კარგად იციან ის გამოწვევები, ძალიან კარგად იციან ის პრობლემები, რომელიც დღეს სასამართლოშია და ბევრმა მათგანმა საკუთარ თავზე გამოსცადა ის მანკიერი პრაქტიკა და წნეხი, რომელსაც დღეს კლანი ახორციელებს. სისტემას სჭირდება სიღრმისეული რეფორმა და არა ზედაპირული მიდგომები, რომელმაც არაფერი არ შეცვალა. ვნახეთ, რომ ადამიანები თავის თავს ასახელებენ მიუხედავად იმისა, რომ სერიოზული საკონსტიტუციო რეფორმა ჩატარდა, ძალიან დიდი ძალისხმევა დაიხარჯა ამასთან დაკავშირებით, მაგრამ საბოლოო ჯამში ფურცლის ნაგლეჯზე ამოკითხული გვარები არის შეურაცხყოფა თუნდაც მართლმსაჯულების სისტემის და თუნდაც პარლამენტის“, - განაცხადა ნაზი ჯანეზაშვილმა.