დონალდ ტრამპის თქმით, ამერიკა-მექსიკის საზღვარზე ჰუმანიტარული კრიზისია, რომელსაც მხოლოდ საზღვარზე კედლის აშენება გადაჭრის.
ოვალური კაბინეტიდან მიმართვისას პრეზიდენტმა განაცხადა, რომ არალეგალური იმიგრაცია ქვეყნის უშიშროებას და ამერიკელების უსაფრთხოებას რისკის ქვეშ აყენებს და გაიხსენა რამდენიმე მკვლელობა, რომელიც არალეგალი იმიგრანტების მიერ იქნა ჩადენილი
აშშ-ის პრეზიდენტმა ფედერალური მთავრობის მუშაობის შეფერხებაზე კიდევ ერთხელ დააკისრა პასუხისმგებლობა დემოკრატებს და განაცხადა, რომ კრიზისი, რომელიც შექმნილია საზღვართან, შესაძლოა, რამდენიმე წუთში მოგვარდეს, თუმცა ეს არ ხდება.
პრეზიდენტის მიმართვამდე, ვრცელდებოდა ხმები იმის შესახებ, რომ დონალდ ტრამპი საგანგებო მდგომარეობას გამოაცხადებდა და ამით მოიპოვებდა შესაძლებლობას, კონგრესის გვერდის ავლით, კედლის ასაშენებლად საჭირო ფინანსები მოეძიებინა, თუმცა მან ეს არ გააკეთა.
დონალდ ტრამპი ოთხშაბათს აშშ-ისა და მექსიკის საზღვართან ჩავა და შესაძლოა ეს ბერკეტი, რაც საგანგებო მდგომარეობის გამოყენებას უკავშირდება, სწორედ საზღვართან მისვლის შემდეგ გამოიყენოს.