ხორავას ქუჩაზე მოკლული მოზარდის მამამ, ზაზა სარალიძემ და მისმა მეუღლემ საპატრიარქო უკვე დატოვეს.
როგორც პატრიარქთან შეხვედრის შემდეგ ზაზა სარალიძემ განაცხადა, ის პატრიარქმა სიონის ტაძარში დაპატიჟა, სადაც პირველად ეზიარა. მისივე თქმით, პატრიარქთან შეხვედრაზე ხორავას ქუჩაზე მომხდარი მკვლელობის შესახებ არ უსაუბრიათ.
„შევხვდი პატრიარქს, მკვლელობასთან დაკავშირებით არ გვისაუბრია, უბრალოდ დღეს დამპატიჟა თავად უწმინდესმა სიონის ტაძარში, სადაც პირველად ვეზიარე და იქიდან დამპატიჟა სადილზე. მეოთხედ შევხვდი პატრიარქს ჩემი ცხოვრების მანძილზე, ძალიან დიდი ძალა გადმოვიდა ჩემზე. პატრიარქის ნათესავმა გამომაცილა და მას ვეუბნებოდი, რომ ეს არის სულიერი სიმშვიდის ტერიტორია, შიგნით რომ შედიხარ, სულ სხვა ძალით გამოდიხარ, აბსოლუტურად დამშვიდებული“, – განაცხადა ზაზა სარალიძემ.
ილია მეორე ზაზა სარალიძეს საჩუქრად ხატი გადასცა.
