პასუხისმგებლიანი დაკრედიტების ამოქმედებით, პრემიერის მსგავსად, საპროცენტო განაკვეთების შემცირებას ელის ეროვნული ბანკის პრეზიდენტიც, თუმცა, კობა გვენეტაძეს საკითხის გრძელვადიან ჭრილში განხილვის რეკომენდაცია აქვს.
მთავარი ბანკირი ამბობს, რომ ცალსახად, საპროცენტო განაკვეთებთან დაკავშირებით შეუძლებელია რაიმე პროგნოზის გაკეთება, რადგან მასზე გავლენას ძალიან ბევრი ფაქტორი ახდენს, მათ შორის, რეფინანსირების განაკვეთი, რომელიც ინფლაციის ტეხილის მოძრაობის პარალელურად ზრდის ან კლების მიმართულებით შეიძლება შეიცვალოს.
„საპროცენტო განაკვეთი არის ის მაჩვენებელი, რომლის დინამიკას გრძელვადიან პერიოდში უნდა შევხედოთ. ზოგადად, ვფიქრობ, გრძელვადიან პერიოდში ეს (პასუხისმგებლიანი დაკრედიტება) გამოიწვევს საპროცენტო განაკვეთების შემცირებას. ის რისკფაქტორიანი მსესხებელი, რომელიც იღებდა სესხს შემოსავლის დადასტურების გარეშე, აღარ იქნება ამ ფაქტორში. აღარ იქნება აუცილებელი მაღალი რისკის მინიჭება და მაღალი საპროცენტო განაკვეთები“, - განმარტავს სებ-ის პრეზიდენტი.