18 დეკემბერს გაეროს განვითარების პროგრამის (UNDP) მუდმივი წარმომადგენელი საქართველოში, ლუიზა ვინტონი, სამუშაო ვიზიტით აჭარის ავტონომიურ რესპუბლიკას ეწვევა.
ლუიზა ვინტონი შეხვდება თორნიკე რიჟვაძეს - აჭარის ავტონომიური რესპუბლიკის მთავრობის თავმჯდომარესდა აჭარის ავტონომიური რესპუბლიკის წარმომადგენლებს.
ვიზიტის ფარგლებში გაეროს განვითარების პროგრამის (UNDP) ხელმძღვანელი გახსნის მაჭახელას ეროვნული პარკისა და მისი მიმდებარე სოფლების ხელშეწყობის პროექტის შემაჯამებელ კონფერენციას. გლობალური გარემოსდაცვითი ფონდის (GEF) მიერ 1.3 მილიონი აშშ დოლარით დაფინანსებული პროექტი 2014-2018 წლებში აჭარის ავტონომიური რესპუბლიკის მთავრობასთან და საქართველოს დაცული ტერიტორიების სააგენტოსთან მჭიდრო თანამშრომლობით განხორციელდა.
UNDP-ის ხელმძღვანელი ასევე ხელს მოაწერს ხელშეკრულებას აჭარის ავტონომიური რესპუბლიკის მთავრობასთან, რომლის თანახმად აჭარა თავის წვლილს შეიტანს ევროკავშირის დაფინანსებით მიმდინარე 10 მილიონი ევროს ღირებულების პროექტის „ENPARD-3: საქართველოს სოფლის განვითარების ხელშეწყობა“ განხორციელებაში. აჭარაში ეს ინიციატივა სოფლის განვითარებასა და მცირე და საშუალო ბიზნესს ეხმარება. აჭარის ავტონომიური რესპუბლიკის მთავრობის თანამონაწილობა 230,000 ევროს შეადგენს.
