საზოგადოებამ რაც გუშინ ნახა, იყო მოქალაქეების ფუნდამენტური უფლებების დარღვევა, პოლიციისთვის უკანონო ბრძანების მიცემა, „ქართულ ოცნებასთან“ დაკავშირებული მოძალადეების ორგანიზება და შემდეგ მათთვის ხელის დაფარება, - ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ სოფელ ველისციხესთან განვითარებულ მოვლენებთან დაკავშირებით განაცხადა.
მისი თქმით, ეს ყველაფერი კიდევ ერთხელ გვახსენებს, რატომ არის საჩქარო ხელისუფლების იძულება, რომ საარჩევნო სისტემა შეცვალოს და შემდეგ ეს ხელისუფლება მისივე თქმით, პოლიტიკურ წარსულს ჩაბარდეს.
„ყოველდღიურად ადგილი აქვს კანონის უგულვებელყოფას, უსაფრთხოებისა და ძალადობის კულტივაციას, როგორც ცხოვრების ყოველდღიური წესის. პოლიციელები უკანონო ბრძანებების მსხვერპლი თავად არიან. ეს არის ძალიან მძიმე რეალობა, საიდანაც ქვეყანა უნდა გამოვიყვანოთ. ჩვენსა და „ნაციონალურ მოძრაობას“ შორის მნიშვნელოვანია განსხვავებები იმაზე, როდის და როგორ უნდა ვიმოქმედოთ, ჩვენი პოლიტიკური ღირებულებებიც განსხვავდება ბევრ შემთხვევაში, მაგრამ ქვეყნის პრობლემა ეს არ არის, ქვეყნის პრობლემა ივანიშვილი და მისი მმართველობაა“, – განაცხადა ბოკერიამ.