დღეს დაგითმეთ დედა, დედაჩვენი გახდა საქართველოს პრეზიდენტი და საქართველოს მთავარსარდალი, ეს ჩვენთვის, შვილებისთვის დიდი სიამაყეა, – ამის შესახებ საქართველოს პრეზიდენტის, სალომე ზურაბიშვილის შვილმა, თეიმურაზ გორჯესტანმა განაცხადა.
მისი თქმით, ეს საქართველოსა და ემიგრაციის ისტორიაში ნიშნავს, რომ ემიგრანტების მემკვიდრე დაბრუნდა საქართველოში.
„ამ მომენტში, მართალი რომ გითხრათ, ჩემს ბებიასა და ბაბუაზე ვფიქრობდი ბევრს. ამ მომენტში მგონია, რომ ყველა ერთად ვფიქრობთ საქართველოს მომავალზე, საქართველოს დემოკრატიულ განვითარებაზე და რაც არის ალბათ ჩვენი ოჯახისა და ამ ქვეყნისთვის მთავარი – ამ ქვეყნის ევროპული მომავალი“, – განაცხადა თეიმურაზ გორჯესტანმა, რომელმაც აქვე აღნიშნა, რომ სალომე ზურაბიშვილი იქნება საქართველოს ყველა მოქალაქის პრეზიდენტი, მათ შორის მათიც, ვინც ხმა არ მისცა.
„ეს იყო ევროპული ნაბიჯი, რომ საქართველო გამთლიანდეს და განვითარდეს როგორც ევროპული, დამშვიდებული, გამთლიანებული ქვეყანა. მან თქვა, რომ იქნება ყველას პრეზიდენტი. სიმბოლური იყო, რომ ინაუგურაცია მოხდა თელავში, სადაც არ მიიღო ხმების უმრავლესობა. დარწმუნებული ვარ, ის იქნება ძლიერი პრეზიდენტი, იქნება არამარტო ოჯახისა და მხარდამჭერების სიამაყე, არამედ მთელი ქვეყნისა და ისტორიის სიამაყე“, – დასძინა თეიმურაზ გორჯესტანმა.