ჩვენი სურვილი იყო, ევროპული საპრეზიდენტო არჩევნები ჩატარებულიყო, თუმცა „ნაციონალურმა მოძრაობამ“ ყველაფერი გააკეთა, რომ არჩევნებს ერთგვარი რეფერენდუმის სახე მიეღო, – ამის შესახებ საპარლამენტო უმრავლესობის ლიდერმა არჩილ თალაკვაძემ გაერთიანებული ოპოზიციის აქციასთან დაკავშირებით განაცხადა.
მისი თქმით, საზოგადოებამ მეორე ტურში „ნაციონალური მოძრაობის“ დაბრუნებას ძალიან მაღალი მონაწილეობით უარი უთხრა.
თალაკვაძის განცხადებით, „ნაციონალურ მოძრაობაში“ უნდა გაიაზრონ, რომ არჩევნებში დამაჯერებლად დამარცხდნენ.
„მათ უჭირთ თავიანთ ამომრჩევლებს უთხრან, რომ დიდი სხვაობით დამარცხება აღიარონ. ერთადერთი, რაც რჩებათ ისაა, რომ მხარდამჭერებს დესტაბილიზაციისკენ მოუწოდონ, თუმცა საზოგადოება ხედავს, რომ შეკრება და მანიფესტაცია ჩვენი ხელისუფლების პირობებში დაცულია. დესტაბილიზაციის მოწყობის საშუალება არავის არ მიეცემა“, – განაცხადა არჩილ თალაკვაძემ.
ცნობისთვის, 16 დეკემბერს პრეზიდენტის ინაუგურაციის პარალელურად გაერთიანებული ოპოზიცია თელავში აქციას გამართავს.