აშშ-ის კონგრესის წარმომადგენელთა პალატამ მიიღო რეზოლუცია, რომლის მიხედვითაც 1932-1933 წლებში მიმდინარე შიმშილობას, ე.წ. „ჰოლოდომორს“, უკრაინელი ხალხის გენოციდად აღიარებს. ინფორმაცია აშშ-ში უკრაინის საელჩომ გაავრცელა.
რეზოლუციის ტექსტის მიხედვით, საბჭოთა კავშირის ლიდერი იოსებ სტალინი და კომუნისტური პარტიის ხელმძღვანელობა დადანაშაულებულია უკრაინელი ხალხის წინააღმდეგ გენოციდის ორგანიზებაში.
უკრაინის პრეზიდენტი პეტრო პოროშენკო მიკრობლოგ „ტვიტერის“ მეშვეობით გამოეხმაურა აღნიშნულ რეზოლუციას და მას „ისტორიული გადაწყვეტილება“ უწოდა.
აღსანიშნავია, რომ აშშ-ის სენატმა მსგავსი შინაარსის რეზოლუცია ჯერ კიდევ მიმდინარე წლის ოქტომბერში მიიღო.
ცნობილია, რომ რუსეთის ხელისუფლება გმობს „ჰოლოდომორის“ გენოციდთან გაიგივებას.
ჰოლოდომორი - მასობრივი შიმშილობა, რომელმაც 1933 წლის პირველ ნახევარში უკრაინის მნიშვნელოვანი ტერიტორია მოიცვა და დაახლოებით 2,2 მილიონი ადამიანი შეიწირა (ზოგიერთი მონაცემებით 10 მილიონამდე). შიმშილობა გამოწვეული იყო საბჭოთა პოლიტიკით, რომელმაც კერძო მეურნეები იძულებით გააწევრიანა კოლექტიურ მეურნეობებში. არსებობს დასაბუთებული ვარაუდი, რომ ჰოლოდომორი ხელოვნურად იყო გამოწვეული უკრაინული ნაციონალიზმის ჩასახშობად და ამგვარად იურიდიული თვალსაზრისით გენოციდად შეიძლება ჩაითვალოს. სხვა მოსაზრებით, ჰოლოდომორი საბჭოთა ინდუსტრიალიზაციასთან დაკავშირებული რადიკალური ეკონომიკური ცვლილებებით გამოწვეული ტრადიციული შინამეურნეობების მოშლის შედეგი იყო.
2003 წელს გაეროში მიღებულმა ერთობლივმა დეკლარაციამ მასობრივი შიმშილობა ტოტალიტარული რეჟიმის პოლიტიკისა და არაჰუმანური ქმედებების შედეგად აღიარა, რასაც საბჭოთა კავშირში მილიონობით უკრაინელის, რუსის, ყაზახისა და სხვა ეროვნების ხალხის დაღუპვა მოჰყვა. 2008 წლის მარტისთვის უკრაინის პარლამენტმა და დაახლოებით 19 სხვა ქვეყნის მთავრობამ საბჭოთა მთავრობის ქმედებები გენოციდად მიიჩნია. 2008 წლის 23 ოქტომბერს ევროპის პარლამენტმა მიიღო რეზოლუცია, რომელმაც ჰოლოდომორი კაცობრიობის წინააღმდეგ ჩადენილ დანაშაულად სცნო.