საქართველოში მიწაზე ძალიან დაბალი მოთხოვნაა და მიწების უდიდესი ნაწილი დაუმუშავებელია., - განაცხადა "გირჩის" ლიდერმა, ზურა ჯაფარიძემგადაცემაში "რეაქცია", მიწის უცხოელებისთვის მიყიდვაზე მორატორიუმის გაუქმების შესახებ.
“არავითარი საფრთხე არ არსებობს, სინამდვილეში ეს ყველაფერი არის, რაღაც ირაციონალური შიშები ან გარკვეული პოლიტიკოსების მხრიდან წამოჭრილი თემები, რომლებსაც იყენებენ იმისთვის, რომ გაცოცხლდნენ პოლიტიკურ სივრცეში.
სინამდვილეში, არანაირი რიგი არ დგას უცხოელების მხრიდან საქართველოში მიწის შესყიდვაზე. ქართული მიწის ყიდვაზე რომ რიგი იდგეს, ქართული მიწის ფასი იქნებოდა არა თეთრები, როგორც ახლა არის, არამედ ეღირებოდა ძალიან ძვირი, ისე როგორც არის განვითარებულ ქვეყნებში, სადაც მიწას, როგორც აქტივს, მართლა აქვს ფასი, რადგან მასზე არის მაღალი მოთხოვნა. საქართველოში მიწაზე ძალიან დაბალი მოთხოვნაა და მიწების უდიდესი ნაწილი დაუმუშავებელია. მიუხედავად იმისა, რომ მილიარდებს ვხარჯავთ სოფლის მეურნეობაში, დაუმუშავებელი მიწების ფართობები იზრდება, მიწა სინამდვილეში არავის არ სჭირდება“, - განაცხადა ჯაფარიძემ.
ცნობისთვის, საკონსტიტუციო სასამართლოს პლენუმმა სასოფლო-სამეურნეო დანიშნულების მიწების უცხოეთის მოქალაქეებზე გასხვისებასთან დაკავშირებით დაწესებული მორატორიუმი არაკონსტიტუციურად გამოაცხადა. მოსამართლეებმა გადაწყვეტილება საბერძნეთის მოქალაქეების საჩივრის საფუძველზე მიიღეს, რომლებიც მემკვიდრეობით მიღებულ მიწის ნაკვეთებს საკუთრებაში ვერ ირეგისტრირებდნენ. უცხოეთის მოქალაქეებზე მიწების გასხვისების მორატორიუმი ძალადაკარგულად გამოცხადდა, თუმცა შეზღუდვები მხოლოდ 16 დეკემბრამდე მოიხსნა, რადგან პრეზიდენტის ინაუგურაციის შემდეგ ახალი კონსტიტუცია ამოქმედდება, რომელიც სასოფლო-სამეურნეო დანიშნულების მიწების უცხოეთის მოქალაქეებზე გასხვისების შესახებ შეზღუდვებს კვლავ აწესებს.