2018 წლის ოქტომბერში, ელექტროენერგიის მოხმარება წლიურად 3.2%-ით გაიზარდა. მოხმარების ზრდაში ყველაზე დიდი წვლილი შეიტანეს კვალიფიციურმა საწარმოებმა, რომელთა მოხმარებაც წლიურად 40.5%-ით გაიზარდა. ეს აიხსნება მაისში ამოქმედებული საკანონმდებლო ცვლილებებიდან გამომდინარე პირდაპირი მომხმარებლების ჯგუფში ახალი კომპანიების დამატებით.
დისტრიბუციის ლიცენზიანტების მოხმარება წლიურად 0.7% შემცირდა, რაც ზემოთაღნიშნულ საკანონმდებლო ცვლილებას უკავშირდება. თუმცა აღსანიშნავია, რომ ამ მიზეზებით გამოწვეული კლება სადისტრიბუციო ქსელებში ნაწილობრივ დააკომპენსირეს ახალმა კომერციულმა და სამომხმარებლო აბონენტებმა.
მოხმარების ზრდასთან ერთად ადგილობრივი გენერაციის კლებამ ელექტროენერგიის იმპორტის 46.1%-იანი წლიური ზრდა გამოიწვია. ელექტროენერგიის იმპორტმა 2018 წლის ოქტომბერში ჯამური მიწოდების 22.7% შეადგინა. იმპორტის 87.8% განხორციელდა აზერბაიჯანიდან, ხოლო დანარჩენი - თურქეთიდან (ესკოს ბარტერზე შეთანხმების ფარგლებში).
ჰიდროგენერაციის 0.8%-იანმა და თბოგენერაციის 17.2%-იანმა კლებამ ელექტროენერგიის ადგილობრივი წარმოება 5.5%-ით შეამცირა. ენგურ/ვარდნილის გაზრდილი მოხმარება (+21.6% წ/წ) არ აღმოჩნდა საკმარისი არასახარბიელო ჰიდროლოგიური პირობებით გამოწვეული დერეგულირებული (-18.1% წ/წ) და სხვა მარეგულირებელი (-8.3% წ/წ) ჰესების გამომუშავებაში კლების დასაკომპენსირებლად.
2018 წლის ოქტომბერში გარანტირებული სიმძლავრის საფასური წლიურად 3.8%-ით შემცირდა და კვტ.სთ-ზე 0.72 აშშ ცენტი შეადგინა.