გუშინ, 10 დეკემბერს, საფრანგეთის პრეზიდენტმა ემანუელ მაკრონმა საფრანგეთის მოსახლეობას ტელევიზიით მიმართა და 2019 წელს მინიმალური ხელფასის ზრდასა და სხვა საგადასახადო შეღავათებს დაჰპირდა.
მაკრონის თქმით, 2019 წელს მინიმალური ხელფასი 100 ევროთი გაიზრდება, იმ პენსიონერებისთვის, რომელთა შემოსავალი 2000 ევროზე ნაკლებია, არ დაწესდება სოციალური მოსაკრებელი, ხოლო ზეგანაკვეთური შრომის ანაზღაურება აღარ დაიბეგრება. გარდა ამისა, საფრანგეთის პრეზიდენტმა ქვეყანაში არსებულ კრიზისზე, რომელიც ერთთვიანმა საპროტესტო ტალღამ გამოიწვია, პასუხისმგებლობის წილი გაიზიარა, თუმცა სასტიკად დაგმო პოლიციელებზე თავდასხმა.
აღსანიშნავია, რომ მაკრონის შეთავაზებები საფრანგეთის ბიუჯეტს 10 მილიარდ ევრომდე დაუჯდება.
საფრანგეთში უკვე ერთი თვეა ყოველ შაბათს ანტისამთავრობო გამოსვლები მიმდინარეობს, რომელიც მოძრაობა „ყვითელი ჟილეტების“ მიერ არის ორგანიზებული.
თავდაპირველად ბენზინზე გადასახადების გაზრდას ავტომობილის მძღოლები აპროტესტებდნენ, თუმცა დემონსტრანტების მოთხოვნები გაფართოვდა. მაკრონმა უკვე განაცხადა, რომ საწვავზე გადასახდები აღარ გაიზრდებოდა, თუმცა ამის მიუხედავად 8 დეკემბერს პარიზსა და სხვა ქალაქებში „ყვითელი ჟილეტების“ მასშტაბური აქცვიები გაიმართა, რომელიც არეულობებში გადაიზარდა. სამართალდამცველებმა ქვეყნის მასშტაბით 1000-ზე მეტი დემონსტრანტი დააკავეს.