გაერთიანებულმა ოპოზიციამ სალომე ზურაბიშვილის რეგისტრაციიდან მოხსნის მოთხოვნით სარჩელით სასამართლში სარჩელი შეიტანა.
ოპოზიცია მიიჩნევს, რომ ხელისუფლებამ დაარღვია საქართველოს კანონმდებლობა, და ამავე კანონების მიხედვით, რეგისტრაციიდან უნდა მოიხსნას ის კანდიდატი, რომლის სასარგებლოდაც განხორციელდა მოსყიდვა ან მოსყიდვის დაპირება.
"ჩვენ სასამართლოში შეგვაქვს სარჩელი, გამოვიკვლიეთ ყველა ფაქტობრივი გარემოება და ვითხოვთ, სალომე ზურაბიშვილის რეგისტრაციიდან მოხსნას, ამას ითვალისწინებს საარჩევნო კოდექსის 47-ე მუხლი, რომელშიც არის ამომრჩევლის მოსყიდვაზე საუბარი. არჩევნების დანიშვნის შესახებ შესაბამისი სამართლებრივი აქტის გამოქვეყნებიდან არჩევნების საბოლოო შედეგების გამოქვეყნებამდე აკრძალულია: საარჩევნო სუბიექტების, საარჩევნო სუბიექტების კანდიდატებისა და მათი წარმომადგენლების მიერ პირადად ან ვინმეს მეშვეობით საქართველოს მოქალაქეებისთვის ფულადი სახსრების, საჩუქრებისა და სხვა მატერიალური ფასეულობათა გადაცემა, მიუხედავად მათი ღირებულებისა, შეღავათიან ფასად საქონლის მიყიდვა, უფასოდ ნებისმიერი საქონლის, გარდა ამ კანონით გათვალისწინებული სააგიტაციო მასალის მიწოდება ან გავრცელება. აგრეთვე საქართველოს მოქალაქეების დაინტერესება ფულადი სახსრების გადაცემის დაპირებით. ჩვენ ძალიან კარგად გვახსოვს, ერთის მხრივ 600 ათას ადამიანზე თაღლითური დაპირება, რომ რაღაც სესხები გაუუქმდებათ, არანაირ 600 ათას ადამიანს არ უუქმდება, მაგრამ ეს არის პირდაპირ ამომრჩევლის მოსყიდვა, მეორე, ყველას კარგად გვახსოვს ხახვები, კარტოფილები, უფასო მეორადი ტანსაცმლის დარიგება, ამ ყველაფრის ვიდეო მასალა გვაქვს, რომელსაც ჩვენ წარვადგენთ სასამართლოში", - განაცხადა ვაშაძემ.
მისი თქმით, მათ სარჩელს თან ერთვის, ყველა ავტორიტეტული საერთაშორისო სადამკვირვებლო ორგანიზაციის დასკვნა, სადაც პირდაპირ მითითებულია, რომ არჩევნები მასობრივი მოსყიდვის პირობებში მიმდინარეობდა.