თუ ჩვენ გვინდა, რომ შევდგეთ, როგორც სახელმწიფო, როგორც დემოკრატიული საზოგადოება, აუცილებელია, ყველა ასეთ ფაქტს ჰქონდეს რეაგირება სამოქალაქო საზოგადოების მხრიდან, - ამის შესახებ ბრიფინგზე გაერთიანებული ოპოზიციის "ძალა ერთობაშია" ერთ-ერთმა ლიდერმა გიორგი ვაშაძემ ია კერზაიას საქმესთან დაკავშირებით განაცხადა.
ის იმედოვნებს, რომ ია კერზაიაზე განხორციელებულ სავარაუდო ზეწოლის ფაქტზე გამოძიება ობიექტურად წარიმართება და შესაბამისი პირების პასუხისმგებლობის საკითხი დადგება.
„მე გამოვთქვამ იმედს, რომ საზოგადოების თითოეული წევრი დადგება ბაჩანა შენგელიას და მთელი ოჯახის გვერდით ამ საქმის დეტალურად შესწავლასთან დაკავშირებით“, - განაცხადა გიორგი ვაშაძემ.
მისივე თქმით, დაუშვებელია, მსგავსი რამ ხდებოდეს 21-ე საუკუნეში.
„თუ ჩვენ გვინდა, რომ შევდგეთ, როგორც სახელმწიფო, როგორც დემოკრატიული საზოგადოება, აუცილებელია, ყველა ასეთ ფაქტს ჰქონდეს რეაგირება სამოქალაქო საზოგადოების მხრიდან, თითოეული ჩვენგანის მხრიდან იმიტომ, რომ დაუშვებელია, მსგავსი რამ ხდებოდეს 21-ე საუკუნეში, ქვეყანაში, რომელსაც პრეტენზია აქვს ევროკავშირის წევრობაზე და ქვეყანაში, რომელსაც პრეტენზია აქვს დემოკრატიის განვითარებაზე“, - აღნიშნა გიორგი ვაშაძემ.
ცნობისთვის, ზუგდიდის მე-6 საჯარო სკოლის დირექტორი, ია კერზაია გუშინ გარდაიცვალა.
ია კერზაია ინსულტის დიაგნოზით, საავადმყოფოში მძიმე მდგომარეობაში იმყოფებოდა და მკურნალობას გადიოდა, თუმცა ექიმებმა მისი გადარჩენა ვერ შეძლეს.
მისი ჯანმრთელობის მდგომარეობა მას შემდეგ გაუარესდა, რაც სკოლაში გენერალური ინსპექცია შევიდა.
სკოლის დირექტორი ამბობდა, რომ სკოლაში ინსპექციის შესვლა არჩევნებს უკავშირდებოდა.
კერზაია აბობდა, რომ რაც დირექტორმა პედაგოგების საარჩევნო პროცესში უკანონოდ ჩართვაზე უარი თქვა, ანონიმური წერილის საფუძველზე ინსპექციამ თბილისიდან ზუგდიდში ორი თანამშრომელი გაგზავნა და მეექვსე სკოლის შემოწმება დაავალა. შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი.
