ზუგდიდის მე-6 საჯარო სკოლის დირექტორი, ია კერზაია გარდაიცვალა.
ია კერზაია ინსულტის დიაგნოზით, საავადმყოფოში მძიმე მდგომარეობაში იმყოფებოდა და მკურნალობას გადიოდა, თუმცა ექიმებმა მისი გადარჩენა ვერ შეძლეს.
მისი ჯანმრთელობის მდგომარეობა მას შემდეგ გაუარესდა, რაც სკოლაში გენერალური ინსპექცია შევიდა.
სკოლის დირექტორი ამბობდა, რომ სკოლაში ინსპექციის შესვლა არჩევნებს უკავშირდებოდა.
კერზაია აბობდა, რომ რაც დირექტორმა პედაგოგების საარჩევნო პროცესში უკანონოდ ჩართვაზე უარი თქვა, ანონიმური წერილის საფუძველზე ინსპექციამ თბილისიდან ზუგდიდში ორი თანამშრომელი გაგზავნა და მეექვსე სკოლის შემოწმება დაავალა. შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი.
მას შემდეგ, რაც კერზაია საავადმყოფოში გადაიყვანეს, ხელისუფლების მხრიდან ზეწოლაზე მისი შვილი, ბაჩანა შენგელია საუბრობდა.
შენგელია მომხდარზე პასუხისმგებლობას განათლების სამინისტროს აკისრებს და გამოძიების დაწყებას ითხოვს.
„აუცილებლად უნდა აგოს პასუხი ვინც ეს მკვლელობა ჩაიდინა. ეს არის მკვლელობა, მეტი არაფერი, რომელიც დაგეგმეს და განახორციელეს განათლების სამინისტროში. სამწუხაროდ, ერთი კვირის მანძილზე, მიუხედავად დიდი ბრძოლისა მაინც დამთავრდა წარუმატებლად. აღარ მყავს მე დედა და საქართველოს აღარ ჰყავს ძალიან, ძალიან მაგარი ადამიანი. ეს არის მკვლელობა. აუცილებლად მე მივმართავ ყველას ვისაც ეს ეხება, სამართალდამცავ ორგანოებს, დაიწყონ გამოძიება ორგანიზებულ დანაშაულში. მკვლელობის შეკვეთა, შესრულება ორგანიზება, უსწრაფესად დაისაჯონ ის ადამიანები“, - განაცხადა ბაჩანა შენგელიამ.