მომავალ წელს ჩვენ ჩავატარებთ ერთობლივ წვრთნებს, რაც ძალიან მნიშვნელოვანია და დასტურია იმის, რომ ერთი გუნდი ვართ, – ამის შესახებ საზოგადოებრივ მაუწყებელს სამხრეთ კავკასიისა და ცენტრალური აზიის საკითხებში ნატო-ს გენერალური მდივნის სპეციალურმა წარმომადგენელმა ჯეიმს აპატურაიმ განაცხადა.
მისი თქმით, გასულ კვირას ნატო-ში გამართულმა შეხვედრებმა დაადასტურა, რომ საქართველოსთან დაკავშირებით ორგანიზაციაში მიღებული გადაწყვეტილებები, მათ შორის ბუქარესტის გადაწყვეტილება ძალაშია. მისივე თქმით, ნატო რჩება ერთგული ამ გადაწყვეტილებების და აგრძელებს საქართველოს მხარდაჭერას.
„ნატო-ს წევრი ქვეყნები მიესალმებიან საქართველოს მიერ მიღწეულ პროგრესს და ამბობენ, რომ ნატო-ს მიერ მხარდაჭერილი რეფორმები ეხმარება საქართველოს, რომ ასპირანტი ქვეყანა დაუხლოვდეს ნატო-ს სტანდარტებს. ნატო აგრძელებს საქართველოს მხარდაჭერას და საქართველო აგრძელებს რეფორმებს. მომავალ წელს ჩვენ ჩავატარებთ ერთობლივ წვრთნებს, რაც ძალიან მნიშვნელოვანია და დასტურია იმის, რომ ერთი გუნდი ვართ. ნატო – საქართველოს ერთობლივი სწავლება 2019 წლის გაზაფხულზე გაიმართება”, – აღნიშნა აპატურაიმ.