9 დეკემბერს “შერატონ გრანდ თბილისი მეტეხი პალასი” დასაქმების ფორუმს აწყობს, რომელიც თბილისის საკრებულოს შენობაში გაიმართება.
აღნიშნულ ღონისძიებაზე სასტუმროს ადმინისტრაცია იწვევს ყველა დაინტერესებულ პირს, ვისაც სურს თავისი პროფესიული საქმიანობა სტუმართმოყვარეობის დინამიურ სფეროში განაგრძოს.
დაინტერესებულ კანდიდატებს შესაძლებლობა ექნებათ პირისპირ გაესაუბრონ კვალიფიციურ პროფესიონალებს, დაუსვან მათ შეკითხვები თითოეული ვაკანსიის მოთხოვნების შესახებ და მიიღონ რეკომენდაციები განაცხადის შევსების თაობაზე.
“შერატონ გრანდ თბილისი მეტეხი პალასი” დასაქმების ფართო არჩევანს თავაზობს კანდიდატებს და 250 პროფესიონალის დასაქმებას გეგმავს. ვაკანსიები გამოცხადდება სხვადასხვა თანამდებობებზე შესყიდვების, დაცვის, საინჟინროს, დასუფთავების, დაჯავშნისა და მიმღებ განყოფილებებში, აგრეთვე სამზარეულოში, რესტორნებში, ბარებსა და გამაჯანსაღებელ ცენტრში.
„ჩვენ გვაქვს მოლოდინი, რომ 9 დეკემბერს არაერთ საინტერესო კანდიდატს შევხვდებით, რომელიც მონდომებულია შეუერთდეს შერატონის გუნდს“- განაცხადა „შერატონ გრანდ თბილისი მეტეხი პალასის“ გენერალურმა მენეჯერმა ანდრეას ჰეიდინგსფელდერიმ.
საქართველოში პირველი საერთაშორისო ბრენდის ხუთვარსკვლავიანი სასტუმრო - „შერატონ გრანდ თბილისი მეტეხი პალასი“ 2019 წლის გაზაფხულზე სრულიად განახლებული სახით გაიხსნება და თანამედროვე დიზაინის 220 ოთახს, 2000 კვადრატულ მეტრ მრავალფუნქციური შეხვედრების სივრცეებს, ბარებს, რესტორნებს, სპასა და გამაჯანსაღებელ ცენტრს შესთავაზებს სტუმრებს. აღსანიშნავია, რომ შერატონ გრანდ თბილისი მეტეხი პალასი ცოტა ხნის წინ მარიოტის საერთაშორისო ქსელის წევრი გახდა. ამავდროულად სასტუმროს მიენიჭა „გრანდ“ კატეგორია, ამ სტატუსის მქონე სასტუმროები გამოირჩევიან განსაკუთრებული ადგილმდებარეობით, მაღალი დონის მომსახურებით, დახვეწილი რესტორნებით, ბარებითა და გამაჯანსაღებელი ცენტრებით.